Verfekê AKP’yî Omer Çelîkî, derheqê qanûnê çarçewayî de îfade kerd ke seba ke amancê ‘Tirkîyeya bê teror’ û ‘herêma bê teror’ bêro caardene, rêxistine, ganî hem Tirkîya, hem zî Iraq, Sûrîye û Îran de zî çekan rono.
Verfekê AKP’yî Omer Çelîkî, merkezê pêroyî yê partîya xo de derheqê rojevî de eşkerayîye daye. Omer Çelîkî derbasbîyayîşê qanûnê çarçewa yê Meclîsê Pêroyî ser o qisey kerd û wina vat: “Vizêrî rojêka tarîxî bî. Meclîsê ma bi vengêko gird qanûnê çarçewa ke do rêxistine werte ra wedarno, qebul kerd. Bi hewldayîşê Serekkomarê ma û birêz Devlet Bahçelî, no proses resa na merhale. Ge-ge alozî û problem vejîyayê, la bi îradeyê Serekkomarê ma û birêz Devlet Bahçelî vernîya nê prosesî abî. Meclîsî de komîsyonêk awan bî û komîsyonî raporêk ke rayvistiş dîyar kerdêni, hedre kerd. Bi 468 rayan, derbasbîyayîşê qanûnê çarçewa hetê sîyasî ra zî manaya xo gird o.”
Dewamê qiseyê xo de, Omer Çelîkî îfade kerd ke kurdî şerê Îranî de nêbîyî hetê şerî û planê temîyankerdişê herême ser o veng vetê. Omer Çelîkî dîyar kerd ke raydayîş 468 rayan qebulî, seba qanûnê çarçewa mesajêko muhîm dayê û vat: “No mesaj do Iraq, Sûrîye û Îranî ser o zî tesîr bikero. Ê do vajê; problemê wina girdî bi qanûnan eşkenê çareser bikerê û do tesîrêko no hawa ê herêman ser o zî bikero. Tayê wazenê mabenê gedeyanê Firat û Dîcle û Kizilirmakî de şer vejê. Ma zî seba gedeyanê Dîcle û Firat û Kizilirmakî destê yewbînan bigîrê, çi destê ma ra bêro ma do bikerê.”
Omer Çelîkî, dîyar kerd ke seba ke amancê ‘Tirkîyeya bê teror’ û ‘herêma bê teror’ bêro caardene, rêxistine hem Tirkîya û hem zî Iraq, Sûrîye û Îranî de çekan rono û wina dewam kerd: “Badê teslîmkerdişê çekan, Heyetê Teqîpkerdişî yenê awankerdene û no heyet do teqîp bikero. Bi raporê MGK’yî zî qanun do bikewo pratîk. No qanûn gamêka şênber seba veradayîşê çekan û tasfîyekerdişê rêxistine bi garantîyê qanûnî yo. Çîyo muhîm resayîşê amancî yo.”
