Anqar – Serekê Meclîsî Numan Kurtulmuş, çarçewaya amadekerdişê Qanûnê Çarçewayî de seba awankerdişê Komîsyonê Çimdarî yê Meclîsî ewro do partîyanê sîyasîyan zîyaret bikero. Zîyaretê Numan Kurtulmuşî do heta 12ê teşrîna peyêne dewam bikerê.
Serekê Meclîsî Numan Kurtulmuş, seba awankerdişê Komîsyonê Çimdarî ewro Meclîs de zîyaretê partîyanê sîyasîyan ra dest pê keno. Ame texmînkerdene ke Komîsyonê Çimdarîye yê Meclîsî, Qanûnê Çarçewayî ke amade bo, zîyaretan ra pey do dest bi xebatanê xo bikero. Ame texmînkerdene ke Numan Kurtulmuş ewro Meclîs de seata 14:00î de Koma CHP’yî û dima Yenî Yolî zîyaret bikero. Numan Kurtulmuş do sibe zî zîyaretanê xo Koma DEM Partî û AKP’yî reyde dewam bikero.
Goreyê agahîyanê ke çimeyanê DEM Partî ra ameyê girewtene, Numan Kurtulmuş do seata 13:30î de Meclîs de Koma DEM Partî zîyaret bikero. Heto bîn ra Numan Kurtulmuş 12ê teşrîna peyêne de zî MHP’yî zîyaret bikero û zîyaretanê partîyanê sîyasî dewam bikero.
Zîyaretê Numan Kurtulmuşî yê partîyanê sîyasî ra pey, Komîsyonê Çimdarîyî yê Meclîsî do bêro awankerdene.
