Temsîlkarê sazgehanê kultur, huner û ziwanî yê Îzmîrî vat ke seba ke destkewteyî bêrê pawitene û demokrasîye aver şêro, ganî têkoşîn û rêxistinbîyayîş bêvindertene dewam bikero.
Çeteyanê girêdayeyê Hukmatê Demkî yê Şamî 6ê çeleyî de hêrişê taxanê Şêxmeqsûd û Eşrefîye ya Helebî kerd û dima ver bi Rojavayê Kurdîstanî şîyî. Xoverdayîş û reaksîyonê şarê kurdî kerd ke 30ê çeleyî de bi mabênkarîya Amerîka û Fransa, mabênê HSD û Hukmatê Demkî yê Şamî de peymane ameye îmzakerdene. La çend ke peymane biba zî ablûqaya Kobanî ser o hema zî dewam kena.
Rayberê Komela Avesta yê Îzmîrî Çeçan Topçu ke 30 serran ra dima hepisxane ra vejîyayo, vat ke şarê kurdan Rojava de sîstemêko bi îstîqrar û aramîye awan kerdbi ke seba heme dinya alternatîf bî la hêzanê mîyanneteweyîyan sey verê seserran, reyna waşt ke dîzaynêko newe awan bikerê û kurdan teber ra verdê. Topçuyî vat ke tarîkerdişê paradigmaya neteweya demokratîke parçeya şerê psîkolîjî yo û wazenê îradeyê şarê kurdî bişiknê. Topçuyî îfade kerd ke peymana peyêne rastkerdişêk nîyo û çeko tewr bihêz yewîye bi xo yo: “Kurdan nîşanê dinya da ke Rojava seba înan xeta sûr a.”
Endamê Komeleya Ziwanî ya Dêrsimîyan Alî Firatî vat ke Hukmatê Demkî nêwazeno ke kurdî bibê wayîrê statû la eke kurdî seba heqanê xo bibê yew, tu hêz nêeşkeno vernîya înan de vindero. Firatî vat: “Dewletî demokrasî nêdanê, şarî awan kenê. Çîyo ke ma seba ci xover danê, yewbîyayîşê kurdan û têkoşînê înan ê seba heqanê xo yo.”
Endama Şûbeyê Komela Heqanê Merdiman a Îzmîrî Zîlan Gumuş vat ke peymane muhîm a seba ke hêrişî vindarnayî û maxdûrîyetî xorînêr nêkerdî û eke têkoşîn biserûber dewam bikero, mumkun o ke heqê kurdan mîyanê Sûrîye de bêrê garantîkerdene. Gumuşe vat: “Her merdimo ke biwazo dinya ver bi cayêko rind de şêro, ganî piştî bido Rojavaî.”
