AMED – Şaredarîya qezaya Gêlî ya Amedî ya ke binê îdareyê AKP’yî de ya, xebata viraştişê tesîsê vame bi mîlyonan lîrayan, bi usulê 21/b (bazarîye) o ke prensîbê “şeffafî û reqabetî” ra dûrî yo, sey teslîmê adrese îhale rê akerd. Şaredarîya ke madeyî seba rewşanê afate û lezgînan ameya eştene kerd mane, îhale bi 11,8 mîlyon TL da fîrmaya merdimê xo.
Şaredarîya qezaya Gêlî ya Amedî ya ke binê îdareyê AKP’yî de, goreyê îdiayanê hemwelatîyan û çimeyanê peroyî bêûsulîyî ameya tespîtkerdiş. Îhaleyê “Xebata Viraştişî Tesîsê Vame yê Gêlî” ke şaredarî kerd, ûsulê esasî yê qanûnî yê ke şeffafî û reqabeto akerde teqdîm kenê îhlal kerdî û ûsulê bazarîye şuxulna.
Bi manayê afate îhaleyo terefgir
Goreyê îlanê peynî ke Platformê Girewtişê Kamuyî yê Elektronîkî (EKAP) ser o ame eşkerakerdiş; îhaleyê “Xebata Viraştişê Tesîsê Vame ya Gêlî” ke Hûmara Qeydê Îhaleyê Kamuyî (KÎK) ya 2026/384574 a, 11ê adare 2026î de ame viraştiş. Ûsulê îhaleyî ke mesrefê ci texmînî sey 13 mîlyon û 712 hezar û 997 TL amebi dîyarkerdiş, bala merdiman ant xo ser. Îdareyo AKP’yij xebata viraştişî ke tu lezgînîya ci yan zî rewşa ci ya bobelate çin a, bi madeyê 21/b yê Qanûnê Îhaleyê Kamuyî yê hûmara 4734î goreyê “Ûsulê Bazarîye” kerd.
Madeyê 21/b yê Qanûnê Îhaleyê Kamuyî; seba afatanê sey laser, erdlerz, adir, nêweşîyanê vilabîyayeyan yan zî seba rewşanê lezgîn can û malî sey îstîsna ameye hedrekerdiş, la şaredarîya AKP’yî ke viraştişê asayî yê tesîsê vame nê madeyî ser o kerd û bi nê hawayî bêûsulîye kerd.
Ûsulê teslîmê adrese vera menfeefanê raya pêroyî yo
Çimeyanê herêmî û derûdorê ke nê hedîse taqîp kenê, dîyar kerd ke tesîsê vame ne afate reyde ne zî rewşêka lezgîne sey can û malî reyde tu eleqeyêka xo çin a û amanco sereke no yo ke menfeetê raya pêroyî (kamu) ke do bi “îhaleyo akerde” bêro pêser, vernîya ayê bêro girewtiş. Herinda ke bi ûsulê îhaleyê akerde zelal bo û bi tewrbîyayîşê ray pêroyî bêro viraştene, ame zanayene ke peyê beran de fîrmayanê nedîyarî ameyî dawetkerdiş.
Ame vatene ke no ûsulê dawetkerdişî yê ke ame caardiş, zemin amade keno seba ke teklîfê ke verî ra ser o ameyo pêkerdiş, bêrê dayene ke zerar dano raya pêroyî ro û îhaleyî pêşkêşê grûbanê sermaye yê diyarî bêrê kerdiş.
Kontarê 11.8 mîlyonî ame îmzakerdiş
Goreyê bilançoyo ke vejîya orte, peynîya prosesê ke tede hûmara şîrketanê ke eşkayê teklîf bidê 1ê nîsane 2026î de bi bedêlê 11 mîlyon û 850 hezar TL’yî bi şîrketê Şîrketê Lîmîted ê Tîcaretê Sanayê Taahhut ê Pakîye û Barkerdişî yê Tekstîl Înşaetî FET-NAS’î (FET-NAS Mühendislik İnşaat Tekstil Taşımacılık Temizlik Taahhüt Sanayi Ticaret Limited Şirketi) reyde peyman ameye îmzakerdiş.
