Sîyasetmedare Kubra Akti derheqê hêrîşê Rojawanî ser de qisey kerd û vat: “Pergalê Kurdan nêkenê û hêriş kenê. Ganî nê hêrişî baş bêrê wendiş. ma vanê, ‘ha yo Rojawan testê samîmîyetî yo’.”
Hêrişê çeteyê girêdayeyê Tirkîya yê şarê Rojawanî ser, her roje wareyê xo hîna zêde hîra kenê. Koma çete ke verê bi nameyê Artêşa Surîyeya Azade (OSO) ameyîne şinasnayîş, nika zî binê nameyê Artêşa Millî ya Surîye (SMO) de qirkerdiş û şîdetê hemverê sîvîlan dewam kena. Pêwa qerarê adirbestî zî hêrişî nînê vindarnayîş û şar mecbûr beno ke koçber bibo, cayê asayîşî de yeno bicakerdiş. Nerazîbîyayîşê hemverê hêrişî de xeylêk cayê dinya, xususî Kurdistan de dewam kenê.
Cinîyê sîyasetmedarî yê Wanî derheqê hêrişan de Jinnewsî ra qisey kerdî.
‘Ganî netewaya Kurdî bêro şinasnayîş’
Hemşaredara Elbaqî Şengul Polat da zanayîş ke sebebê hêrişan statuyê ke Kurdan Rojawan de bi dest kerdo û wina vat: “Hêzê mîyanneteweyî eke wazenê Surîye de vurnayîş bikerê, ganî vernê de neteweya Kurdî ya hemverê çeteyan de têkoşîn kenê nas bikerê. Ganî vernê de hêrişê hemverê Rojawanî bêrê girewtiş. Ganî têkoşînê şarê Kurdî qebûl bikerê. Ganî hemverê DAIŞî de têkoşînêk yewbîyaye pê bêro. Nê dir do Surîyeya demokratîke bibo.”
‘Pawitişê Rojawanî berpirsyarîyê ma hemîne yo’
Hemşaredara Westanî Kubra Akti zî dîyar kerd ke pawitişê Rojawanî berpirsyarîyê pêro şaran o û wina vat: “Raştîya DAIŞî Kobanê de hemverê şarê Kurdî de vînî kerd. Ciwanî, dayîkê Kurdî do zorê DAIŞî berê. Nê semedî ra ganî şarê Kurdî hemverê nê sîstemî de bêro pawitiş. Ganî ma pêro wayîrê Rojawanî vejîyê.”
Kubra Akti wina peynî ard: “Tehemulê estbîyayîş û sîstemê Kurdan nêkenê û hêriş kenê. Ganî nê hêrişî baş bêrê wendiş. Eke Tirkî waştişê aştîye de samîmî bibê, ma vanê; ‘ha yo Rojawan testê samîmîyetî yo’. Destê xo bikerê binê sîye û ma pîya nê testê samîmîyetê ra derbaz bibê.”
Endama Meclîsê Şaredarîya Elbaqî Seyran Korkmaz vat hêrişê Rojawanî de rolê Tirkîya pîl o û wina qedêna: “No nîno qebûlkerdiş. Hêrişê giran hemverê cinîyan de yo. Cinî nê qebûl nêkenê. Ganî ma hemverê hêrişê Rojawanî de bibê. Ganî ma wayîrê Rojawanî vejîyê. Ma Kurdî nê hêrişan qebûl nêkenê.”
