Rayberîya Xosere dîyar kerd ke hêrişê ke vera Kobanê û Kantonê Cizîre yenê kerdene, şerêko plankerde û sîstematîk o, û çeteyê HTŞ’yî berpirsîyar ê. Rayberîya Xosere vera nê sûcan vengdayîşê mudaxeleyê lezabezî kerd.
Rayberîya Xosere ya Demokratîke ya Rojawanî eşkerayîyêka nuştekî weşanaye.
Eşkerayîye wina ya:
“Ma teyît kenê ke ma bi temamîya xo bi adirbestîya ke ameya îlankerdene, astengkerdişê rijnayîşê gonîya şarê xo, pawitişê emnîyet û stabîlîyetê herêma xo ra girêdaye yê. Labelê grûbê çekdarî ke girêdayeyê hukmatê Şamî yê, bi qestî û bi sîstematîkî adirbestîye îhlal kenê û bi bêrehmîye vera sîvîlan û herêmanê ma yê ciwîyayîşî, bi taybetî vera bajarê Kobanê û Kantonê Cizîre hêriş kenê.
Hêrişê ke vera Kobanê yenê kerdene tena hêrişêko eskerî nîyo, sûcê şerî yo. Kobanê tarîxî de noqtaya agêrayîşî ya û bîya cayê peynîya rêxistina terorîste ya DAÎŞ’î ke seba heme însanîyetî tehdîtêko girs bî. Ewro Kobanê yeno hedefgirewtene çike sembolê xoverdayîşî yo û dinya pawite. Ewro Kobanê seba hêrişanê domdaran ke vera binawanîya ci yenê kerdene, awe, elektrîk û xizmetê bingeyinan ra bêpar mendo. Tewr peynî girêdayîşê înternet ame birnayene û dinya ra bêxebere bîye.
‘Şerêko sîstematîk ê jenosîdî yo’
Çîyê ke Kobanê û Kantonê Cizîre de qewmîyenê, şerêko sîstematîk ê jenosîdî yo ke bi taybetî vera şarê kurdî, bi armancê şiknayîşê îradeyê şarê ma û qedînayîşê destkewteyan yeno kerdene. Heme dinya bîye şahîdê îhlal û sûcanê ke vera kurdan, şervanê Reqa û herêmê bînan ameyî kerdene. Ewro nê sûcî reyna yenê tekrarkerdene.
Ma hêrişanê wehşîyan ê ke vera şarê ma yenê kerdene, bi şîdet şermizar kenê. Ma hêrişkeran berpirsîyarê netîceyan hesibnenê. Ma venga komelê mîyanneteweyî danê, Koalîsyonê Mîyanneteweyîye yê Vera DAÎŞ’î zî tede, ke hêrişî lezabez bivindarno û sûcê ke vera sîvîlan yenê kerdene biqedîno.
Sewbîna zî, ma venga şarê xo yê qerardar, dostanê şarê kurdî yê her çar parçeyanê Kurdîstanî û her cayê dinya ra danê ke sewîyeya têkoşîn û xoverdayîşî xurt bikerê û destkewteyanê ke bi saya xoverdayîşê şehîd û şervananê ma û îradeyê şarê ma yê azadî ameyê girewtene, bipawê.
‘Ewro roja yewbîyayîşê neteweyî ya’
Ewro roja yewbîyayîşê neteweyî ya. Ewro, kurdê her çar parçeyanê Kurdîstanî vera sûcê jenosîdî bîyê yew. Tarîx do nê xoverdayîşî bi herfanê zerrnênan binuso. Şarê ma do girêdayîş û qerardarîya xo ya heqanê azadî, rûmet û cuye bipawo.”
