Eşkerayîya bi munasebetê serra 32. ya Qirkerdişê Madimakî de ame waştene ke seba ke edalet bêro ca ganî têrîameyîş bibo.
Partîya Herêman a Demokratîke (DBP9 bi munasebetê serrgêra Qirkerdişê Madimakî ya 32. eşkerayîyêka nuştekî weşanaye. Eşkerayî de ame vatene ke rixmo ke qirkerdişî ser o 32 serrî vîyartî zî bêedaletî û bêhiqûqî dewam kenê û hewl yeno dayene ke serê sucê nefretî bêro girewtene. Dewamî de ame vatene ke zîhnîyeto ke zanyar û hunermendî hedef girewtê, eynê wextî de aştî û demokrasî zî hedef girewto.
Vengdayîşê têrîameyîşî
DBP’yî dîyar kerd ke kesê ke hêrişkaran pawenê, ê ke xelate danê înan û hiqûqî araste kenê, ganî bizanê ke do tu wext nêeşkê biresê amancê xo. DBP’yî vat ke ê do vera hêriş û her tewir kerdişan her tim waştişê welatijîya seypê bikerê. DBP’yî vat: “Ma nê sucî vera merdimîye reyna şermezar kenê û vanê seba ke edalet bêra ca ganî têrîameyîş bibo. Ma soz danê ke do hesabê qirkerdişî bêro persayene û seba edalet û demokrasî bêro nê welatî, ma do bi qerardarî têkoşînê xo bidomnê. Ma beşna xo vera ê kesanê ke qirkerdişî ameyê kiştene, tewînenê.”
Eşkerayîya HDK’yî
Kongreya Demokratîke ya Şaran (HDK) zî qirkerdişî sey “şermêko giran ê tarîxê Tirkîya erjna. HDK’yî îfade kerd ke 33 zanyar û hunermendî çimanê her kesî ver de ameyê veşnayene û kiştene. No hêrişêko vera merdimîye, vera wijdanê merdimîye yo û vera îradeyê pîya ciwîyayîşo aştîyane û demokrasî yo. HDK’yî wina vat: “Sey HDK ma reyna vanê ke ma Qirkerdişê Sêwasî şermezar kenê. Kesê ke ameyê kiştene bi rêzdarî anê xo vîr û vanê ke do tu wext têkoşînê edaletî ra fek veranêdê. Qirkerdişê Sêwasî, Roboskî ra heta Cizîrî, Pirsûsî ra hera Gezî xelekêka zilm û necezakerdişê bi destê dewlete yo. Sey HDK seba ke hesabê nê qirkerdişê bipersê û seba ke heqîqet vejîyo orte û aştîya komelkî awan bikerê, do têkoşînê ma dewam bikero.”
