Rayedarêke Îranî qebûl kerd ke numayîşanê Komara Îslamî ya Îranî de 2 hezar kesî merdê. Neteweyanê Yewbîyayan zî semedê polîtîkayanê tedakar ê Îranî nerazîbîyayîşê xo îfade kerdê.
Komîserê Berz ê Heqanê Merdiman ê Neteweyanê Yewbîyayeyan Volker Turk vat ke no rejîmo tedakar û tersnok nêeşkeno dewam bikero. Ganî vengê şarê Îranî û waştişê înan ê seba edaletperwerî, têduştî û edaletî bêrê eşnawitiş. Rayedarêke Îranî roja sêşeme zî Reutersî rê vat ke numayîşanê Îranî de nêzdîyê 2 hezar kesî ameyê kiştiş û berpirsîyarê mergê sivîlan û karmendanê ewleyî, çalakîker ê. Sewbîna berpirsîyarê heqanê merdiman ê Neteweyanê Yewbîyayeyan ewro vat ke ê zî tedaya zêde ya hêzanê leşkerî yê Îranî yê vera çalakîkeran ra “biters ê.”
Hûmara kişteyan bi seyan a
Komîserê Berz ê Heqanê Merdiman ê NY’yî Volker Turkî eşkerayîyêk de ke hetê verfekê ofîsê heqanê merdiman ê NY’yî Jeremy Laurence ra ame wendene, wina ame vatene: “No çerxo tedakar û tersnok nêbeno ke dewam bikero. Ganî vengê şarê Îranî û waştişê înan ê seba edaletperwerî, têduştî û edaletî bêrê eşnawitiş.” Wexto ke rojnamegeran Laurence ra waşt hûmara kişteyan ser o şîrove bikera zî Laurence, çimeyanê NY ê Îranî îşaret kerd û vat: “Hûmarê ke ma eşnawenê bi seyan ê.”
Îran Iternational: Zafêrê 12 hezarî kesî ameyî kiştene
Îran International texmîn kerd ke numayîşanê Îranî de zafê ci şewanê pancşeme û îne de zêdeyê 12 hezar kesî ameyê kiştiş û serebûtî sey “tewr zêde kiştişê ke tarîxê Îran ê modernî de” bi name kerd. Eynî wextî de daneyê rêxistananê heqanê merdiman dîyar kenê ke hûmara merdeyan zî 646 kesan ra zafêr a
