NADA veng da; wa şerê Xeze û Sûdanî bêro qedênayîş û hetkarîya merdimeyîye bireso her di welatan û waşt ke heme dewlet û şîrketê ke destê înan fînansekerdişê şerran de est o, hesab bidê.
Yewîya Cinîyan ê Demokratîkan a Herêmî ya Rojhelatê Mîyanênî û Vakurê Afrîka (NADA) derheqê şerê Xeze û Sûdanî de beyanatêko nûştekî weşana.
Beyanat de ame vîrardiş ke Teşrîna Verêne ya 2023î ra nata Xeze bi jenosîdêko ke bi belgeyan îsbat biyo rî bi rî de ya. Ame dîyarkerdiş ke no qirkerdiş hetê “îttîfaqê emperyalîstî yê mîyanneteweyî û bêvengîya ereban” ra yeno paştîdayene.
Goreyê beyanatî; semedê şerê Xeze ra bi des hezaran cinî û domanî zî tede, 54 hezar kesan ra zêde ameyî qetilkerdiş, 123 hezar kesan ra zêde birîndar bîyê û bi des hezaran kesî zî vînîbîyaye yê. Na herême de dorpêç û vêşanîye dewam kenê.
Beyanat de ame destnîşankerdiş ke teberê bomvardûman û koçberkerdişê bi zorî de, rayîr nîno dayîş ke hetkarîya merdimeyîye Xeze rê derbas biba. Ame vatiş ke qedexekerdişê derbasbîyayîşê hetkarîye yew raybazêko bîn ê qirkerdişî yo û vera heme qanûnanê mîyanneteweyan o.
Derheqê Sûdanî de zî ame vîrardiş ke 15ê Nîsana 2023î ra nata Sûdan mîyanê şerêko topyekûn de yo û wina vatiş: “Netîceyê şerî de 150 hezar kesan ra zêde ameyî kiştene, 12 mîlyon kesî koçber bîyê û nêweşîya kolera zî vila bîya. Ma vînenê ke mesûlê na rewşa Sûdan û Filistînî nê yê:
-Sîyonîstî, sey sûcdarê qirkerdişî yê. Dewletê Amerîka yê Yewbîyayeyî (DAY) û welatê bînî yê emperyalîstî paştî danê hêrişî û qatîlan pawenê.
-Rejîmê Ereban ê yewperestî zî paştîyêka sîyasî û aborî danê semedê ke qirkerdişê vera şaranê filistînijî û Sûdanî dewam bikerê.
-Hetê Sûdanî yê ke mîyanê înan de pêameyîş çin o, welat kerdo meydanê şerêko akerde û rayîrê rijîyayîşî akerdo.
-Dezgehê Miletanê Yewbîyayeyan (MY) û dezgehê mîyanneteweyî wezîfeyê xo yê exlaqî û qanûnî bi eşkerayîyanê ‘qayîlî û vengdayîşê seba aramîye’ bedilnayo û qebul kerdo ke bibê şirîkê sûcî.”
NADA’yî peynîya beyanatî de nê vengdayîşî kerdî:
“Lezûbez şer û qirkerdişê Xeze vindarnê, dorpêçî wedarnê, bê şertanê verênan yan zî bê mîyansitaran, rayîrê mekanîzmayêka adîle û bêterefe ya MY’î ra hetkarîya merdimeyîye herême rê resnê. Derîyanê sînorî bi şeklêko daîmî akerê, ca bidê ke waştî, derman û awa pakî herême rê derbas bibê. Sûdanî sey herêmêka weşîye û merdimeyîye ya felaketî îlan bikerê û korîdoranê lezûbezan akerê. Şerê Sûdanî rew vindarnê, hetkarîye sey kartêko sîyasî yan zî çekêka bazarîye meşuxulnê. Heta ke nêweşîya kolera bi temamî wertê ra nêhewanîya û xizmetê bingeyênî nêameyî garantîkerdiş, propagandaya agêrayîşê koçberan mekerê. Resnayîşê çekan seba hetanê ke destê înan qirkerdoxan de est o vindarnê, cezayan bidê dewlet û şîrketanê ke paştî danê şerran.”
