Serekkomarê Îranî Mesud Pezeşkîyanî DYA reyde derheqê muzakereyanê de vat: “Dişmenêko ke ceza, teda û tehdîdan tatbîq keno û peymanan xeripneno, ey reyde muzakere mana nêdana. Şarê ma zî nêzdîbîyayîşêkê winasî qebul nêkeno.”
Medyaya Îranî notê pêvînayîşê Serekkomar Pezeşkîyanî û Wezîrê Karanê Teberî û Bazirganîya Mîyanneteweyî yê Armenîstanî Ararat Mîrzoyanî weşanayî.
Pezeşkîyanî vat: “Problemê ma û DYA no yo: Her ke ma ronişenê masaya muzakere, cade şer ma ser o ferz beno. Heta nika badê pêvînayîşan hîrê rey ma ser o hêriş bî. No nawneno ke ê muzakere nêgêrenê; amancê înan rijnayîşê îdareyê Komara Îslamî ya Îranî yo.”
Pezeşkîyanî vat ke programê nukleerî yê Îranî hetê Ajansa Enerjîya Atomî ya Mîyanneteweyî ra pêt yeno kontrolkerdene: “Her ke kontrolkarî yenê Îran, tesîs û zanyarê ma yê nukleerî yenê tesbîtkerdene; dima tesîsî yenê bombebarankerdene û zanyarê ma rastê sûîqestan yenê. Goreyê huqûqê mîyanneteweyî, heqê înan çin o ke tesîsanê nukleeran ser o hêriş bikerê ke binê kontrolê Ajansî de yê.”
Pezeşkîyanî dîyar kerd ke tu hereket û tepşê DYA yê vera Îranî goreyê huqûqê mîyanneteweyî nîyo û vat: “Dişmenêko ke her roje sûîqest, ceza, teda û tehdîdan tatbîq keno û peymanan xeripneno, ey reyde muzakere mana nêdana. Şarê ma zî nêzdîbîyayîşêkê winasî qebul nêkeno.”
