Mustafa Karasuyî ard ziwan ke raporê Komîsyonê Meclîsî kêm o û vat: “Seba ke Rayber Apo sey muzakerekar û muxatapî bêro qebulkerdene, ganî hetê meclîs dezgehê sîyasetî ra qerar bêro girewtene.”
Endamê Konseya Rayberdiyî yê KCK’yî Mustafa Karasuyî programêkê taybetî yê Medya Haber TV’yî de everşîyayîşê rojdemî erjnayî.
Mustafa Karasuyî derheqê raporê Komîsyonê Meclîsî de nê vatî: “Serrêke nîm o goreyê prosesî qet gamêke nêameye eştene. Rapor zî biney wina yo. Hem tay erjnayîşî est ê. Qalê demokratîkbîyayîşî beno. Vano ‘hinî têna bi asayîşî nêbeno’ ganî tay qanûnî bêrê vetene. Vano wa bêhuqîye biqedîyê. Erjnayîşê sey ‘o wext bikerê, destê xo bikerê binê kerra” ameyî kerdene. Inkey kêmayîyê raporî yenê qiseykerdene. Na meseleya terorî nê, meselaya kurdan a. Ê zî zanê xora.
Ganî meselaya wina muhîme rê cîddî bêro nizdîbîyayene. Ganî verî nameyê mesele bêro panayene. Tewiro qerardar hewce keno. Ganî rapor de meseleya kurdan, erstbîyayîşê kurdan biameyêne qebulkerdene. Xora zaf raporanê verênan e dewlete de meseleya kurdan ameya qebulkerdene. Ganî vetişê ‘teror’î ra bêro xelisnayene. Seserrî yo ke seba ke kurdî tira feyde mekerê demokratîkbîyayîşî ra remenê. Ma nê raporî kêm vînenî û wazenê bêro raştkerdene.”
‘Ganî Rayber Apo bibo azad, bieşko azad bixebito’
Karasuyî wina dewam kerd: “Devlet Bahçelî veng da Rayber Apoyî vat ‘Bê rêxistina xo fes bikerê, heqê hêvîye ra feyde bikerê.’ Mesela cîddî ya. Na meseleya kurdan a. Şarê kurdî vano Rayber Apo ser muzakerekarê ma yo. Ma sey têgêrayîşê azadîye yê kurdan vanê Rayber Apo ser muzakerekarê ma yo. Na mesele têna bi muzakereyî, bi muxatabîya Rayber Apoyî yena çareserkerdene. Tay selahîyetdarî şini Îmrali, pêvînayîş kenê la no qîm nêkeno. Ganî Rayber Apo eşkera şarî rê qisey bikero. Ganî Rayber Apo bibo azad, bieşko azad bixebito.
Avarşîyayîşê prosesî bi tewirê Rayber Apoyî bewlî beno. Eke muxatabî rê raşt nîno nizdîbîyayene, no mojneno ke nîno waştene ke mesele bêro çareserkerdene. Eke çaresekerdişê mesele yeno waştene, ganî ser muzakerekarî dir pêvînayîş bêro kerdene. Na bebete de rapor de nizdîbîyayîşo cîddî çîn o. Hema zî vanê ‘terorîzm.’ Wina nêbeno. Ganî rewşa Rayber Apoyî qetî bêro zelalkerdene. Bieşko herê bivîno. Rayber Apo wazeno çapemenîye û rayberanê partîyanê sîyasîyan reyde qisey bikero.”
Karasuyî bale ante ser ke hêrişê vera Rojawanî dewam kenê û vat ganî hêzê kurdan bi tewirê hemparî destkewteyanê xo bipawê.
Karasuyî ard ziwan ke azadîya cinîyan bingeyê komelê demokratîkî yo û vat 8ê Adare Roja Cinîyan a Dinya de ganî têkoşîn bêro xurtkerdene xeta azadîye bêro hêzdarkerdene.
