Besê Hozate T24 rê qisey kerd û vat: “Rayber Apo nasnameyê kurdan o, şarê kurdan o. Azadîya Rayber Apoyî qebulkerdişê nasnameyê kurdan o, çareserîya meseleya kurdan a. Çike Rayber Apo yew kes nîyo, nasnameyêko kolektîf o.”
Hemsereka Konseya Rayraberdişî ya KCKyî Besê Hozate T24î ra Tugçe Tatar rê roportajêk da û derheqê merasîmê çekveşnayîşî, qanûnê çarçewa, azadîya Rayber Apoyî û prosesî de nirxnayîşî kerdî.
Hozate merasîmê çekveşnayîşî ser o vat: “Çekveşnayîş çalakîyêka sembolîke bî û îfadeyê vîyartişê stratejîya sîyasetê demokratîkî bî. Ma stratejî bedilnaybî û qerardarîya xo bi na çalakîya sembolîke ardêne meydan.”
Hozate bale ante kêmanîyanê qanûnê çarçewa ser o û vat: “Kêmanî û xeletîyê qanûnî zaf zêde yê. Eke no qanûn bi qanûnanê îlaweyan nêro xurtkerdene tu problem pê çareser nêbeno. Goreyê qanûnanê dewleta tirke her kesê ke çek girewto dest sûcdar o. La qanûn kesan kerdo di qisman: êyê ke tewrê çalakîyan bîyê û êyê ke nêbîyê. Rayber Apoyî na dewlete rê yew gule zî nêeşta. Coka ganî Rayber Apo nê qanûnî ra îstîfade bikero û cade heqê hêvîye bêro naskerdene.”
Hozate da zanayene ke gerîla ancîyayo Herêmanê Pawitişê yê Medya û vat: “Ma heme qewetê gerîla yê Vakurê Kurdîstanî antî Herêmanê Pawitişê yê Medya. Nika Tirkîya de yew gerîla zî çin o. Ma tunelê şerî yê Metîna zî xeripnayî. Nika ganî Tirkîya gamanê demokratîk, sîyasî û huqûqîyan bieştêne. Gama verêne zî na ya ke Rayber Apo bieşko prosesî bi azadî, bi fermî û fîîlî biramo. Nameyê ci statu yo.”
Hozate sewbîna ard vîrî ke Devlet Bahçelîyî heta nika zaf nirxnayîşê eyînîyî kerdî la nê vatişî nêbîyî gamêka şênbere û vat: “Na rewşe şik û endîşe ana meydan. Gelo Bahçelî zî parçeyê sîyasetê wextvîyarnayîşî yo?”
