Platformê Sazgehanê Demokratîk ê Amedî newe ra qerar girewt ke mîtîngê “Hêvî û Azadîye” yê 4ê çeleyî de seba şertanê hewayî amebi taloqkerdene, do 25ê çele de Meydanê Îstasyonî de bêro organîzekerdene.
Platformê Sazgehanê Demokratîk ê Amedî seba eşkerakerdişê tarîxê mîtîngê “Hêvî û Azadîye” ke seba şertanê zimistanî amebî taloqkerdene, Çand Amed de kombîyayîşê çapemenî viraşt. Rayberê DEM Partî, DBP, hemşaredarê DEM Partî yê Amedî, aktîvîstê TJA’yî, temsîlkarê sazgehanê sivîl û xeylê kesî tewrê kombîyayîşî bîyê.
Ganî mîtîngê “Hêvî û Azadîye” yê seba waştişê azadîya fizîkî ya Rayberê Şarê Kurdî Abdullah Ocalanî 4ê çeleyî de Meydanê Îstasyonî de biameyenê kerdene la Platformê Sazgehanê Demokratîkî seba şertanê xirab ê zimistanî mîtîng taloq kerdbi.
Platformî ewro reyna bi kombîyayîşêk ame pêser û qerarê viraştişê mîtîngî girewt. Platformî da zanayîş ke mîtîng do 25ê çele de Meydanê îstasyonî bêro viraştene.
‘Ma do seba azadîya birêz Ocalanî bixebitîyê’
Hemserekê DEM Partî yê Amedî Abbas Şahîn kombîyayîşî de qisey kerd û wina vat: “Embazê ma qade de zaf xebitîyayê û xebatêka girde kerde. Wexto ke babete bena birêz Ocalan heme embazê ma qade de bîyê û rixmo ke keyeyê xo de ronişê, xebitîyayê. Seba ke mîtîng virazîyo şertê hewayî baş nêbîyê û ma mîtîngî betal kerd. Amed de keyeyo ke ma nêşîyê, nêmend. Tena Amed de nê rojevê heme Kurdîstanî bi mîtîng û azadîya birêz Ocalanî. Her kes seferber bi. Nika ma kewenê mîyanê xebatêka newîye û ma do reyna keye bi keye kuçe bi kuçe reyna bigêrê. Senî ke birêz Ocalan 26 serrî yo xebitîyeno ganî ma zî seba azadîya ey bixebitîyê. Ma newe ra 25ê çele de saete 13:00î de Meydanê Îstasyonî de mîtîngê xo virazenê. Dimayê eşkerayî ma dest bi xebatanê xo kenê.”
‘Azadîya Rayberê Şarî Kurdî azadîya ma ya’
Hemsereka DBP’yî ya Amedî Rûçem Elyakut zî ard vîr ke mîtîngê înan sebebê şertanê zimistanî amebî taloqkerdene û wina vat: “Ma do mîtîngî seba hêvî û azadîye virazê. Ma pîya xebatêka bi coşe kerde. Reyna bi eyn çoş ma xebata xo ya seba azadîya Rayberê Şarî Kurdî bikerê. Heta ke Rayberê Şarî Kurdî azad nêbo ma zî azad nêbenê. Ma pêro pîya bi vengêko berz biqîrê.”
