Hemserekê Şubeyê ÎHD’yî yê Wanî avûkat Mehmet Salîh Coşkunî raporê AKP’yî erjna û vat: “Tu bedililîyayîşê qanûnan, qanûnê bingeyînî nêgirewtê çiman ver, tu pêşnîyazê bedilîyayîşê qanûnan nêkerdo. Ganî pêşnîyazê qanûnê hemwelatîyî bikerdêne.”
Partîyê sîyasî yê ke Komîsyonê Demokrasî, Waûbirayî û Piştîdayîşê Mîlî de ca girewtêne dima ke goşdarîkerdişê sazgehanê komelkî qedîya, heyetê komîsyonî şi Girawa Îmrali Rayberê Şarê Kurdî Abdullah Ocalan reyde pêvînayîş kerd. Nê pêvînayîşî ra pey partîyan raporê seba taslaxanê qanûnî amade kerd û pêşkêşê komîsyonî kerd. Raporê AKP’yî yo de ke derheqê çareserîya meseleyê kurdî û binpaykerdişê heqanê merdiman ameyo amadekerdene, tu pêşnîyazê çareserî tede çin ê, beno sebebê reaksîyonan û mîyanê şarî de bawerîya seba Prosesê Aştî û Komelê Demokratîkî qels keno.
Rayberê Şarê Kurdî Abdullah Ocalan nê prosesî seba waûbirayîya şarê kurd û tirk, seba awanekerdişê Komarêka Demokratîke sey firsendêko tarîxî erjneno. Proses û pêşnîyazê Rayberê Şarê Kurdî Abdullah Ocalanî çar hetanê dinya û hetê bi seyan kesanê zanyar, akademîsyen, partî û sazgehan ra sey firsendêko tarîxî û çareserîyêka demokratîk û makul ameyê erjnayene. La AKP bi raporo ke amade kerdo zî mojneno ke aştî û çareserî rê amade nîya.
Hemserekê Şubeyê Komela Heqanê Merdiman a Wanî (ÎHD) avûkat Mehmet Salîh Coşkunî derheqê raporê AKP’yî de seba ajansê ma erjnayîşî kerdê.
‘Raporê AKP’yî tasfîyekerdişê PKK’yî ser o ameyo amadekerdene’
Avûkat Mehmet Salîh Coşkunî dîyar kerd ke emserr serrgêra qebulkerdişê beyannameyê heqanê merdiman ê unîversal o 77. o. Ma hewteyê heqanê merdiman de yê û vat: “Nê hewteyî de partîyê sîyasî raporê xo yê seba çareserî pêşkêşê Komîsyonê Meclîsî kerd. Na babetêka muhîm a. Ganî nê raporî raya pêroyî reyde bêrê parekerdene. Vanê ke ganî tu rayberê PKK’yî nêrê Tirkîya de sîyaset nêkerê. La PKK’yî kongreya xo ya 12. de dîyar kerd ke ê falîyetanê xo yê leşkerî danê vindertene û wazenê probleman bi rayîrê sîyasetî çareser bikerê. No rapor nê hetî ra problemin o.”
‘AKP nêwazeno proses aver şîro’
Mehmet Salîh Coşkûn raporê AKP’yî hetê huqûqî ra zî erjna û da zanayene ke rapor hetê huqûqî ra zî kêm o û wina domna: “Tu bedilîyayîşê qanûnan, qanûnê bingeyinî nêgirewto çiman ver, tu pêşnîyazê bedilîyayîşê qanûnan nêkerdo. Ganî pêşnîyazê bedilîyayîşê qanûnê hemwelatîyî bikerdêne. Demo ke merdim raporî ra ewnîyenoi vîneno ke seba çareserkerdişê meseleyê şarê kurdî tu erjnayîşêko şênber çin o. No rapor mojneno ke AKP, hukmatê Tirkîya nêwazenê no proses aver şîro. Çunke çi heyf ke raporî de çîyêko şênber çin o.”
‘Sere de ganî edalet bêra ca’
Mehmet Salîh Coşkûnî îfade kerd ke raporî de seba orterawedaritişê binpaykerdişê heqanê merdiman zî çîyêk çin o û qiseykerdişê xo wina domna: “Bi serran o heqê şarê kurdî yê sîyaset, xoîfadekerdişî yenê binpaykerdene û qedexekerdene. Sere de ganî edalet bêra caardene. Serranê 80, 90 û 2000î de şarê kurd seba heqanê xo yê neteweyî, sîyasî têkoşîn kerd la çi heyf ke dewlete nê têkoşînî terorîze kerd. Bi hezaran kesê vîndîbîyayeyî est ê, merdeyî est ê. Reyna heqê sîyasetî, heqê xoîfadekerdişî ameyê binpaykerdene. Çi heyf ke nê babetî rapor de nêameyê vatene. La komîsyonî Dayîkê Aştî, Dayîkê Şemeyî, Komela Heqanê Merdiman, Baroyê herême û xeylê kesî goşdarî kerdê, pêşnîyazê înan girewtê. Ganî komîsyon nê pêşnîyazan bigîro çiman ver û goreyê ey heqê kurdan bêrê pawitene. Pênaseyê hemwelatîyî ganî bêro bedilnayene.”
