MED-DER û Şaredarîya Licê ya Amedî bi munasebetê 15ê Gulane Roja Roşanê Ziwanê Kurdkî dewa Zenge ya Licê de programê gedeyan viraşt. Gedeyan eleqeyêke zaf gird nîşanê programî da.
Komeleya Cigêrayîşanê Ziwan û Kulturê Mezopotamya (MED-DER) û Şaredarîya Licê ya Amedî bi munasebetê 15ê Gulane Roja Roşanê Ziwanê Kurdkî dewa Zenge ya qezaya Licê ya Amedî de programê gedeyan viraşt. Mamostayê MED-DER’î û xeylê gedeyî tewrê programî bîyê.
Ewilî mamostaya MED-DER’î Dîlan Şeveşoglu muhîmîya ziwanê ser qisey kerd û bale ante serê statu û perwerdeyê ziwanê dayîke û dîyar kerd ke ganî heme keyeyî gedeyanê xo bi ziwanê dayîke pîl bikerê.
Badê qiseykerdişan, seba musayîşê gedeyan tîpê alfabeya kurdkî ame mojnayene û gedeyan bi yew vengî tîpê ke ameyê mojnayene berz kerdî.
Gedeyî badê musnayîşê tîpan, bi pêşengîya mamostayan kayê çekuyan û peyker kaykerd. Tewr peynî de zî gede û mamostayan deyîran reyde govende girewte.
Programo ke gedeyan eleqeyêk weş mojnabî bi heyecanêko gird qedîya.
