Baroyê Wanî, DADSAZ û OHD’yî bi munasebetê 15ê Gulane Roşanê Ziwanê Kurdkî verê awanîya baroyî de eşkerayî daye û vat: “Kilîtê azadîya kurdan ziwanê kurdkî yo”
Komîsyonê Ziwanê Kurdkî ya Baroyê Wanî, Komeleya Cigêrayîş û Perwerdeyîyê Huqûqi (DADSAZ) û Komîsyonê Ziwan û Kulturî yê Komeleya Huqûqnasan seba Azadîye(OHD), bi munasebeta 15ê Gulane Roşanê Ziwanê Kurdkî verê bînaya Baroyê Wanî de eşkerayî daye. Eşkerayî de pankarta “Wa ziwanê kurdkî bibo ziwanê fermî û ziwanê perwerdeyî” ame akerdene û xeylê avûkat tewrê eşkerayî bîyê.
Rayberê DADSAZ’î Veysî Atay metnê eşkerayî wend û bale ante serê tarîxê 15ê Gulane û Kovara Hawarî. Veysî Atay dîyar kerd ke ziwanê kurdkî bingeyê estbîyayîş û nasnameyê şarê kurdî yo û wina dewam kerd: “Kurdkî esasê yewîya neteweyî û kilîtê azadîya kurdan o. Tewlî her tewir hêriş û polîtîkayê asîmîlasyonî, kurdkî se serra estbîyayîşê xo pawena. Her çiqas peymananê mîyanneteweyî de heqê perwerdeyê bi ziwanê dayîke amebî garantîkerdene zî, Tirkîya bi şerhan nêverdena şarê kurdî nê heqan îstîfade bikerê. Goreyê madeyê 42î ê Qanûnê Bingeyin ê Tirkîya bê ziwanê tirkî, perwerdeyo bi ziwanêko bîn qedexe yo. No binpaykerdişê heqanê merdiman o.”
‘Ma do têkoşînê xo seba caardişê statuya kurdkî bidomnê
Veysî Atay peynî qiseykerdişê xo de venga parlamento û rayedaran kerd û dîyar kerd ke ganî heme astengîyê vernîya caardişê ziwanê kurdkî bêrê hewanayene. Veysî Atay serê nameyê huqûqnasanê kurdî vengdayîş kerd û vat: “Ma do têkoşînê xo seba caardişê statuya kurdkî û perwerdeyê bi kurdkî bidomnê. Wa ziwanê kurdkî bibo ziwanê perwerdeyî û ziwanê fermî.”
Eşkerayî bi slogananê derheqê muhîmîya ziwanê kurdkî ra dima qedîya.
