Endam û mamostayê MED-DER’î Rodî Zinarî dîyar kerd ke muracatê kursanê înan heta 15ê teşrîna verêne dewam kenê. Goreyê ey heta nika nêzdîyê 2 hezar kesan muracat kerdo.
Komeleya MED-DER’î 2017î ra nat Amed de bê vindertiş dersê dîyalektanê kirdaskî û kirmanckî/zazakî dana. MED-DER sewîyeya verêne, dîyine, hîrêyine û sewîyeya mamostayîye de perwerdeyê ziwanê kurdkî dana. Muracatê kirdaskî û kirmanckî/zazakî do heta 15ê teşrîna verêne dewam bikerê. Dersê online zî tede heta nika 2 hezar kesan seba perwerdeyê kurdkî muracat kerdo û 16 sinifî ameyê akerdiş. Rodî Zinarî perwerdeyê kurdkî û xebatanê MED-DER’î ser o ajansê ma rê qisey kerd.
‘Waştişê perwerdeyê ziwanî zaf o’
Rodî Zinarî destpêkê qiseykerdişê xo de dîyar kerd ke sewîyeya verêne, dîyine, hîrêyine û sewîyeya mamostayîye de perwerdeyê kirdaskî û kirmanckî/zazakî danê û wina vat: “Eke waştiş bibo ma eşkenê sewîyeya dîyine de perwerdeyê soranî zî bidê. Waştişê wendekaran hende zaf o ke ma nêeşkenê cewab bidê; mamostayê ma kêm ê. Coka hem rîbirî hem zî online perwerde danê. Wexto ke merdimî vînenê ziwanê înan bi kar yeno, hêvîya înan hetê ziwanî ra ganî bena.”
‘Ganî her kes bi ziwanê xo perwerde bivîno’
Zinarî dewamê qiseykerdişê xo de bale ante şeklê perwerdeyî ser o: “Serre de 3 yan zî 4 perîyodê ma est ê; her yew hîrê aşmî yo. Sewîyeya mamostayîye tena rêzimane nîya; tede tarîx, beşê zanistî, formasyon, pedagojî û psîkolojî est ê. Kesê ke yenê tîya, sewîyeya zanayîşê xo anê sewîyeya wendiş û nuştişî. Goreyê ma ganî her kes bi ziwanê xo perwerde bivîno. Eke ti bi ziwanê xo perwerde nêvînî, ti xo rê benî xerîb. Çike ziwan goreyê komelî yo; komelnasî, dîplomasî û psîkolojîya ey est a.”
‘2 hezar kesan muracat kerdo’
Zinarî peynî de dîyar kerd ke xebatê înan dewam kenê: “Qeydê ma do heta 15ê teşrîna verêne dewam bikerê. La nika nêzdîyê 2 hezar kesan hem rîbirî hem zî online muracat kerdo. Na perîyoda hamnanî de ma 16 sinifê rîbirî akerdbî. Muracatî dewam kenê û no zî rind o. Materyal û hacetê ma yê perwerdeyî hazir ê; no het ra tu problem çin o. Sewîyeya na perîyode heta no hewte ya; perîyoda bîne do dest pêbikero.”
