Hewteyê 7. yê Lîgê Superî de Amedspor û Gençlerbirligi yewbînan reyde kay kerd û maç 2-2 qedîya. Bi nê netîceyî Amedsporî lîderîya xo vîndî kerd.
Lîgê Superî de hewteyê 7. yeno kaykerdiş. Amedspor û Gençlerbirligi Stadyumê Eryamanî yê Ankara de yewbînan reyde kay kerd. Heskerdoxanê Amedsporî Ankara de tîma xo tena nêverda.
Destpêkê maçî de her di tîman waşt ke bi zor yewbînan ser o tesîr bikerê la maç heta deqîqeya 20. bi hemsengî vîyart. Deqîqeya 22. de Gift Orban û kalecê Gençlerbirligî rîbirî mendî; kaleciyî Gift Orban eşt erd û Amedsporî penaltî qezenc kerd. Dia Sabayî penaltî eşt û bi gol; Amedspor 1-0 ser kewt. Peynîya nîmeyê verênî de Amedsporî tayê pozîsyonî dîyî la Amedspor nêeşka skor bivurno û nîmeyo verên 1-0 qedîya.
Badê navberî nîmeyo dîyin dest pêkerd. Gençlerbirligîyî nîmeyê dîyinî de waşt ke skor bivurno û bi zor kay kerd. Deqîqeya 53. de Rafael Luisî gol eşt û skor bi 1-1.
Deqîqeya 67. de Samuel Balletî golê dîyin yê Amedsporî eşt û skor kerd 2-1. Deqîqeya 90+2. de Gençlerbirligî golê xo yo dîyin eşt, skor bi 2-2 û maç bi no skor qedîya. Bi nê netîceyî puanê Amedsporî bî 14.
