Komîteya Amadekar a Newroza Wanî programê xo eşkera kerd û dîyar kerd ke prosesê Vengdayîşê Aştî û Komelo Demokratîkî de pîrozbayîyê Newroza emserre wayîrê muhîmîyêka tarixî ya.
Komîteya Amadekar a Newroza Wanî awanîya Partîya Têduştî û Demokrasîyî ya Şaran (DEM Partî) yê Wanî de derheqê amedekarîya Newroze beyanat da. Awanî de pankartê “Newroza azadîye pîroz bo/Newroza azadîyê pîroz be” ame akerdene. Hemşaradara Wanî ya Şaristanê Girdî Neslîhan Şedal, hemserekê DEM Partî û DBP’yî yê Wanî û temsîlkarê sazîyanê sîvîlan tewrê beyanatê bîyê. Metnê Kurdkî yê beyanatî Hemverfeka Komîteya Newroze husamettîn Kiziltaş, yê tirkî zî Hemverfeka Komîteya Newroze Fîgen Çolakoglû wend.
Husamettîn Kiziltaş ard vîrê ke Kawayê Hesinkar Dehaqê zalim textê ey ra ard war. Kelaya zilmî de meşaleyê azadîye wekerd û mizgînî daye şaran. Husamettîn Kiziltaş ard ziwan ke na mizgînîye ser o 2 hezar û 637 serr3i vîyartê û vat: “Meşaleyo ke bi hezaran serrî yo ke sembolê azadîye yo, bi xoverdayîşê şaran heta roja ma ameyo. Meşaleyê azadîye bi paradîgmaya rêxintinbîyayîşî û xoverdayîşê komelî yê birêz Abdullah Ocalanî û Hereketê Azadîye yê Kurdîstanî ewro hîna geş beno. Ma zî kedkar û xoverdayoxanê nê rayîrî bi rêzdarî xo vîr anê.”
‘Adirê Newroze do emserr seba aştî hîna xurt bibo’
Husamettîn Kiziltaş bale ant vengdayîşê Rayberê Şarê Kurd Abdullah Ocalanî yê “Aştî û Komelo Dmeokratîk” û vat: “Pîrozbayîyê Newroza emserre wayîrê muhîmîyêka tarixî ya. Vengdayîşê tarixî yê birêz Abdullah Ocalanî ke 27ê sibate de raya pêroyî rê ame parekerdene, welatê ma de herême û dinya de bi pêroyî bîyo vengdayîşêko birûmet ê aştî. Roşanê Newroze yê emserrî do bibo qadê vengdayîşê aştî yê birûmet. Adirê xoverdayîşî yê ke bi hezaran serrî bi destanê Kawayanê yeno gandarkerdene, do emserr seba aştî hîna xurt bibo. No serdemo ke polîtîkaya bêçareserî ya meseleyê kurdî rijîyaya û ma bi paradîgmayêka newa îmkananê aştî seba heme şaran gêrenê; Newroz do sey roşanê neteweya demokratîk heme şar, komel û bawerîyan bêra pîrozkerdene.”
Programê Newroza Wanî
Husamettîn Kiziltaş behsê programê Newroza Wanî zî kerd û dîyar kerd ke 19ê adare roja çareşeme saet 10:00î de qadê Newroze yê tarixî yê kişta Kelaya Wanî de do “Newroza Komelo Demokratîk ya seba Azadîye” bi tewrbîyayîşê şarî pîroz bikerê. Husamettîn Kiziltaş, detayê programî vatê û wina dewam kerd: “Sloganê newroza emserrî “Raybero Azad û Komelo Demokratîk” o. Beşdarê Newroza emserrî Hemsereka DEM’î Tulay Hatîmogullari, Hemserekê DBP’yî Keskîn Bayindir, Parlamentera Wanî û Endama Heyetê Îmraliyî pervîn Buldan, Parlamenterê Wanî û Serekê Partîya Komunîst ya Kurdîstanî Sînan Çîftyurek û Aktîvîstan TJA’yî Fatma Albay a.”
Hunermendên ke do sehne bigîrê ameyê eşkerakerdene
Husamettîn Kiziltaş vengda sazî û dezgeyanê herême kerd û qiseykerdişê xo wina qedêna: “Ma vengdanê heme endam û temsîlkaranê sazîyanê sivîl, sendîka û rêxistinanê girseyî yê demokratîkan yê herême ke wa bêrê şarê xo reyde beşdarê na Newroza tarixî bibê û pîya pîroz bikerê. Hunermendê Newroza Wanî yê emserre Hunermend Rojda, Hunermend Arhat û Hunermend Fîkret Goyî yê. Newroza serra 2025î ke ma do bi sloganî “Bi adirê Newroze ver bi azadîya Raybertî” pêşwazî kenê nika ra heme kesan ke xover danê, înan rê pîroz bo. Ma heme şarê xo reyna silaynenê qadê Newroza Wanî.”
Endam û rayberê DEM Partî û endamê komîteyî beyanatî ra pey hewşê awanîya DEM Partî de asdir wekerd û govende girewte. Partîyîjan xo adir ser o ra eşt û sloganê “Newroz pîroz be” vat.
