Endama Heyetê Îmraliyî yê Partîya Demokrasî û Seyyewbînîye ya Şaran (DEM Partî) Pervîne Buldan derheqê averşîyayîşanê aktuelan de programê Gundemî yê Medya Haber TVyî qisey kerd. Pervîne Buldan derheqê pêvînayîşê Rayberê Şarê Kurdî Abdullah Ocalanî yê 3ê teşrîna verêne de zanayîş da.
Pervîn Buldan wina va: ”Ma sey heyetî şîyî. Birêz Ocalan zaf xoser, bimoral bi. Ma pêvînayîşo derg û muhîm kerd. Ma Ocalanêko weşîya ci cade bî, qerardar, heyecanin dî.”
Buldan va ke înan bi tepitşeyanê bînan ê Îmraliyî pêvînayîş kerd û vat:”Embaz Hamîlîyî operasyonêko qij vîyarnabi la tewrê pêvînayîşî bi.Weşîya tepişteyanê bînan hol bî. Şertanê Birêz Ocalanî de hema bedilnayîşêk nêbîyo.”
Buldan erjnayîşê prosesî de wina vat: ”Îdayê ke derheqê prosesî de benê raşt nîyê. Kêmayî bibî zî proses dewam keno. Zaf muhîm o ke şertê xebityayîşî yê Birêz Ocalanî bêrê bedilnayene. Eke şertê bibedilîyê o eşkeno cade tewrê prosesê haştîye bibo.”
Bervîn Buldan nê vatî: ”Birêz Ocalanî vat ganî gamê muhîmî vera yewbînan bêrê eştene. Eke wina nêbo kesê ke vera prosesî yê destê înan bêno xurt. Tim nê vano. Ê ke wazenê nê prosesî bixeripnê est ê. Heta vano beno ke makanîgê darbe bikewo dewre. Ma pêvînayîşanê xo de tim nê anê ziwan. Ma xebatê komîsyonî rexne kenê. Ganî gamê huqûqî bêrê eştene û serûberkedişê qanû bêrê kerdene. Ganî hem şertê Birêz Ocalanî bêrê bedilnayene û hem zî komîsyon xebatanê xo lezabez bikero ke proses aver şiro. Ganî wird hetî vera yewbînan lezabez gaman bierzê. Hewteyê verê ma de goştarîkerdişê komîsyonî do biqedîyê. Komîsyon do peyra Wezîrê Karanê Teberî û Serekê MÎTî Îbrahîm Kalinî reyna goştarî bikero û goştarîkerdişî biqedîyê. Ma pawenê ke komîsyon şiro Îmrali û Birêz Ocalanî reyde pêvînayîş bikero. Na babete de pawitişê Birêz Ocalanî est o. Pêvînayîş peyênî de reyna derheqê komîsyonî de şîyayîşê Îmraliyî de qisey kerd û vat ganî komîsyon cade bêro Îmrali. Komîsyon badê goştarîkerdişî ganî şiro Îmrali. Pawitişê Birêz Ocalanî est o. Hema tarîx zelal nêbîyo. Mîyanê yew di hewteyan de badê qedînayîşê goştarîkerdişan ma pawenê ke panc kesan ra heyetêkê komîsyonî şiro Îmrali. Nê panc kesî temsîlkarê partîyan ke grûbê ci Meclîs de est ê.”
