Pêşêngîya DEM Partî de seba ke prosesê Aştî û Komelê Demokratîk aver şêro û hukmat warê qanûnî de game bierzo xeylê şaristananê Kurdîstan û Tirkîya de rayîrşîyayîşê ‘Gamêk seba aştî’ ameyê viraştene.
Pêşengîya DEM Partî de seba prosesê Aştî û Komelê Demokratîk aver şêro bi şîarê “Gamêk seba aştî” xeylê şaristanan de rayîrşîyayîş viraşt. Nê rayîrşîyayîşan ra yew zî qezaya Rezanî yê Amedî de verê hepisxaneyî Humara 5. ra dest pêkerd. Hemsereka Pêroyî yê DEM Partî Tulay Hatîmogullari, Hemserekê Pêroyî yê Partîya Heremanê Demokratîk (DBP) Çîgdem Kiliçgun Uçar û Keskîn Bayindir, Hemverfeka Înîsîyatîfê Yewîya Demokratîk Gulcan Kaçmaz Sayyîgît, Hemverfeka Kongreya Demokratîk a Şaran (HDK) Meral Daniş Beştaş û bi hezaran kesî tewrê çalakî bîyê.
Rayîrşîyayîş de posterê Rayberê Şarê Kurdî Abdullah Ocalan ameyê girewtene û pankartê “Hema nika azadî hema nika aştî” ame akerdene. Rayîrşîyayîş de sloganê “Biciwîyo Aştî”, “Bê Serok jiyan nabe”, “Ciwan fedayîyê Rebêr Apo ne”, “Jin Jiyan azadî” ameyê berzkerdene. Girseya ke bi rayîrşîyayîş ameya verê AZC Plaza eşkerayî da.
Eşkerayî de Hemsereka Pêroyî DEM Partî Tulay Hatîmogullari qiseykerdişê xo de şarê Amedî yo ke tewrê rayîrşîyayîşî bîyo selam kerd û wina vat: “DEM Partî û dostê înan ê seba aştî kom bîyê û nê kesê ke nika rayra şinê hezar reyan selam înan rê. Ganî bê ke Meclîsê bikewo betlane ganî bilez qanûnî bêrê viraştene. Ganî statuya aktorê sereke yê prosesî birêz Abdullah Ocalan bêro dîyarkerdene û şertê ey bêrê başkerdene.” Rayîrşîyayîş bi tilîlî û sloganan qedîya.
Stenbol
Kurdîstan û Tirkîya de rayîrşîyayîşê ‘gamêk seba aştî’ virazîyayê. Stenbol de zî bi pêşengîya DEM Partî rayîrşîyayîş ame viraştene. Şar Peykerê Boga yê qezaya Kadikoy de kom bî û heta Îskeleya Kadikoy rayra şî. Rayîrşîyayîş de venga azadîya Rayberê Şarê Kurdî Abdullah Ocalan ame waştişî. Hemserekê DEM Partî yê Stenbolî Arîfe Çinar û Çinar Altan, Parlamenterê DEM Partî, Rayberê HDK û DBP’yî, Dayîkê Aştî, Ciwanê DEM Partî û HDK’yî, aktîvistê TJA’yî, partîyê Sîyasî û xeylê kesî tewrê rayîrşîyayîş bîyê.
Îzmîr
Rêxistina DEM Partî ya Îzmîrî, bi şîarê “Gamêk seba aştî” rayîrşîyayîş viraşt. Rayîrşîyayîş Meydanê Cumhurîyetî ra ver bi Meydanê Gundogdu ame viraştene. Pankartê bi nuşteyê “Gamêk seba aştî” ame girewtene û bi slogananê “Awankarê aştî Îmralî de yo”, “Bê Serok Jiyan nabe”, “Jin jiyan azadî”, ameyê berzkerdene. Bi seyan kesî tewrê rayîrşîyayîş bîyê, eşkerayîya çapemenî hetê hemsereka DEM Partî yê Îzmîrî Fulya Erdogan ra ame wendene.
Aydin
Rêxistina DEM Partî ya Efelerî, Taxa Osman Yozgatlî de bi şîara “Gamêk seba aştî” rayîrşîyayîş viraşt. Rayîrşîyayîş bi sloganê “Bê Serok Jiyan nabe” ame berzkerdene. Parlamentera DEM Partî ya Îzmîrî badê rayîrşîyayîşî qiseykedişê xo de dîyar kerd ke hetê kurdî seba aştî game eşte û vat: “Ma seba ke cinî azad bibê, karkerî bi edalet biciwîyê, gedeyî wendegehan de bêrê pawitene û seba ameyoxêk baş gaman erzenê. Nê gamî do bibê wesîleyê gamêka xurte yê demokrasî.”
Wan
Hemsereka DEM Partî ya Wanî Gulşen Kurt rayîrşîyayîşê “Gamêk seba aştî” de dîyar kerd ke seba averşîyayîşê prosesî ganî dewlete gamanê şênber bierzo û vat: “Şarê kurdî paweyê nê gaman o.”
Sêrt
Rêxistina DEM Partî ya Sêrte seba azadîya fizîkî ya Rayberê Şarê Kurdî Abdullah Ocalan bi sloganê “Gamêk Seba aştî” rayîrşîyayîş viraşt û waştiş aştî ame kerdene.
Anqara
Hemserekê Pêroyî yê DEM Partî Tuncer Bakirhan rayîrşîyayîşê “Gamêk seba aştî” de qisey kerd û reaksîyon mojna helwêste dewlete û vat: Aştî karêko bi rûmet o. seba karanê rûmetî hewceyê bi gamanê cesuran est a.” Girseyê ke serê rayîr de kom bîbî waşt ver bi meclîsê rayra şorê. Demêko derg ameyê vindarnayene girse bi sloganan reaksîyon mojna astengkerdişê çalakî û waştişê aştî ard ziwan. Badê reaksîyonê girse destûr ame dayene ke girse rayra şêro Cadeyê Sakarya.
Cizîr
Cizîra Botan de bi hezaran kesî seba aştî rayîrşîyayîş viraşt û venga azadîya Rayberê Şarê Kurdî Abdullah Ocalan ame kerdene. Qezaya Cizîre ya Şirnexî de bi hezaran welatijî Meydanê Qesebxaneyê Taxa Cudî de kom bîyê bi pankartê “Gamêk seba aştî” heta çatrayîrê merkezê şaristanî rayra şîyê. Rayîrşîyayîş de bi sloganê “Ma şer nêwazenê, aştî wazenê” û “cinî aştî wazenê” ame berzkerdene.
