Kovara fotograf-roman ‘Bajar’ ewro dest bi weşanî kerd. Edîtorê kovare Dogan Guzelî da zanayene ke waştişê înan o yo ke wendişê kurdkî û hunera xêzî mîyanê kurdan de vîndî nêbo.
Kovara ‘Bajar’ ke binê çapê Şaredarîya Amedê ya Şaristanê Girdî de yena çapkerdene, zafziwanî û xêzî xo de hewîneno. Kovare hûmara xo ya yewine bi cerinbayîşê lehçeyanê kurmancî û soranî yê Kurdkî dest bi weşanî kerd û do aşme de reyêk bi hewayêko dîjîtal bêra weşanayene.
Edîtorê kovare Dogan Guzel derheqê weşan, amadekarî û tedeyîyanê kovare de ma rê qisey kerd.
Guzelî vat ke no huner Ewropa û Amerîka de ameyo averberdene la mîyanê kurdan de kêm o û vat: “Ma hûmara ewile bi lehçeyê Soranî zî vete. La ma seba hetê xo yê teknîkî nêeşkenê bi lehçeya Soranî bidomnê. Seba ke hetê teknîkî ra zehmet o. O semed ra ma hûmar ewile sey nimûne vete. Na xebate bi taybetî seba şarê ma yê Vakurî lazim a. Seba ke wendişê Kurdkî hema zî zehmet o nêwanenê. La eke fotograf û karîkatur est bî û bi Kurdkî bibê do wendiş vêşî bibo. No waştişê ma yo. Eke kovare biba dibistanêk seba nuştoxanê neweyan, seba ma serkewtişêko gird o.”
Guzelî dîyar kerd ke wendişê kurdî seba kesanê ke ewil vanê ‘akademîk o’ û vanê giran yeno û şar terseno ke dest pêbikero, do kovare bêra wendiş û wina vat: “ Na kovare eşkena nê tersî bişikna çunke bi fotograf û hîkaye ya, do hîan asan bêra wendene. Eke nê çend fotograf-roman û karîkatur zî çin bê, ma qedîyenê. Hêdî hêdî hîna baştêr beno. Ez bawer kena ke do tesîrê xo wendişî ser o bikero û bibo destpêkêk.”
