Şaredarîya Şaristanê Girdî ya Amedî çarçewaya şaredarîya zafziwanîye de seba ke termanê kurdkî de ke şaredarîyan de yenê şuxulnayene, standardîzasyonêk bêro meydan, “Xebata Termanê Îdareyê Şaredarîye” amade kerd.
Mudirîya Şûbeyê Pawitişê Ziwanî ya Serekîya Daîreya Karê Kulturî û Komelkî, bi qerarê ke Meclîsê Şaredarîya Şaristanê Girdî girewtbî, seba ke termanê kurdkî de ke şaredarîyan de yenê şuxulnayene, standardîzasyonêk bêro meydan, dest bi xebatan kerd.
Mudirîya Şûbeyê Pawitişê Ziwanî Komela Cigêrayîşê Ziwan û Kulturê Mezopotamya (MED-Der), Weqfa Mezopotamya, Enstîtuya Kurdî ya Dîyarbekirî û kesê ke derheqê ziwanî de cigêrayîş kenê û wayîrê zanayîşî yê, pêro pîya 15 kesî, xebata xo ya verêne Merkezê Kongre yê Çand Amedî de kerde.
Kombîyayîşê ke do her hewte bi hawayêko perîyodîk bêrê kerdene, tede xebatêka hîraye do bêro kerdene û termê ke ser o mutabaqat virazîyayo, do bêrê munaqeşekerdene.
Hemşaredar Hatun beşdarê xebate bî
Hemşaredarê Şaristanê Girdî Doğan Hatun ke beşdarê xebate bî, goştarîya pêşnîyazanê beşdaran kerd û serkewtiş waşt. Hemşaredar Hatunî va: “Ma amade yê ke seba ziwanî her çî ke dest ra yeno, bikerê.”
Farqînî: Kurdkî de do standardîzasyonêk virazîyo
Koordinatorê xebate Zana Farqînî zî va ke nameyê kurdkî yê serekîyanê daîreyan, mudirîyetî, yewîneyî, beşî, nameyî, nuşteyê ke do tabelayan ser o bêrê nuştene, çarçewaya şaredarîya zafziwanî de destpêkî de xebate bi kurdkîya kurmancî kenê.
Farqînî ard vîrardene ke serra 2010î de zî xebata înan a no tewir estbî û va: “Ma tayê terman kerdbî kurdkî. Nê prosesî de nameyê daîreyan vurîyayê, hûmara înan zêde bîya, tayê yewîneyê neweyî abîyê. Ma reyna nê revîzeyê neweyî ser o xebitîyenê.”
Farqînî ke va amaco înan o bîn zî no yo ke pêro şaredarîyan de standardêk bêro tesbîtkerdene, wina dewam kerd: “Yanî kurdkî de tayê çekuyî estê ke yewbînan ra cîya yê, varyantê înan est ê, hemmanayê înan est ê. Seba ke termê nê çîyan ra dûrî vindê û standardêk bêro tesbîtkerdene, ma tîya sey pîlot weçînayo. Dima ke ma tîya qedêna, şaredarîyê ke wazenê tabelayanê xo yê zafziwanî virazê, do xebatanê tîya sey binge bigîrê û bişuxulnê. Bi no qayde, kurdkî de do standardîzasyonêk bêro meydan.”
