Amed de Komxebata Ekonomîya Demokratîke û Xorêxistinkerdişê Ekonomî ke hetê DBPyî ra yena viraştene û do di rojî dewam bikero, dest pêkerd.
Komxebata Ekonomîya Demokratîke û Xorêxistinkerdişê Ekonomî ke bi pêşengîya Partîya Herêmanê Demokratîkan (DBP) yena viraştene, Çand Amed de dest pêkerd. Komxebate do di rojî dewam bikero. Sêmîner de do serê babetanê “Ekonomîya Şaristanî û Dewan”, “Ekonomîya Demokratîke ya Herêmî” û “Gerayîşê vera Newe ra Sazkerdişê Komelî” de erjnayîşî bêrê kerdene. Hemsereka Pêroyî ya DBPyî Çîgdem Kiliçgun Uçar, endamê Sekreterîya Îmralî Çetîn Arkaş, Serekwekîlê Koma DEM Partî Sezaî Temellî, Hemserekê Şaredarîya Amedî ya Şaristanê Girdî Serra Bucak û Dogan Hatun, Hemserekê Şaredarîya Wanî ya Şaristanê Girdî Abdullah Zeydan ke cayê ey de qeyûm ameyo tayînkerdene, endam û rayberê partîyanê sîyasî û dezgeyanê komelî zî tede zaf kesî tewrê komxebate bîyî.
‘Rojhelatê Miyanên de vurîyayîşê zîhnîyetî yê polîtîkî eşkeno bêro kerdene’
Çîgdem Kiliçgun Uçara ke ewilî qisey kerd û wina vat: “Vatena birêz Ocalanî esta ke zaf çîyan eşkera kena, vana: ‘Na dinya de heta morcele zî bêkar û veşan nêmanena, merdim senî bêkar maneno, merdim senî veşan maneno?’ Bêguman no dano mojnayene ke na rewşa ke ma vera ci de têkoşîn danê, çiqas ke bi sîstem û pîlankerde yo. Tarîxê ey de qetîyêke winasî esta ke goreyê fîkrê ma zaf biqedro; tespîtêk dîyar keno ke ekonomî wayîrê senî tewir sifetê komunî ya. Ma nê muaqeşeyî tam mîyanê zemînê têkoşînî de kenê ke ma tede munaqeşeyê merhelaya aştî û komelê demokratîkî rayrabenê û ma bawer kenê ke nê welatî de û Rojhelatê Miyanên de vurîyayîşê zîhnîyetî yê sîyasî eşkeno bêro kerdene.
No zemîno polîtîk, veng dano ma ke ma sînoranê zihnîyetê dewlete û îqtîdaran vera ma ronîyaya, derbas bikerê. Veng dana ke ma qebulkerdişê çîyanê adetîyan zor bikerê û bivurnê. Ma fîkr kenê ke babetanê bingeyînan ra yew ma ganî ser o qisey bikerê, no yo. Naye ra ma no vengdayîş kerd, naye ra ma waşt ke ma pêro pîya aqil û destê xo bierzî nê karî. Ez seba nê fersendî, sipasîya şima hemînan kena ke ewro tîya de ma reyde yê, fîkr û ewnayîşê xo ma reyde pare kenê û do na raywanîya ma ya ekonomîya komunale de zî ma reyde rayîrşinê. Ma munaqeşeyêke zaf krîtîk kenê û tewrê nê munaqeşeyê krîtîkî benê seba pratîkî zî do bi têkoşînê ma pêro pîya bibo.”
‘Ganî vera ferasetê ferdperestî, kulturê kooperatîfanê zaf-şirîkan bêro roniştene’
Çetîn Arkaşî zî ard ziwan ke erdnîgariya Kurdîstanî ewro bi xezaniyêka zaf girane reyde rî bi rî ya û wina vat: “Polîtîkayê şerî û şaşîyê dewlete ekonomîya dewan, ramitiş û weyekerdişê heywanan ver bi qedênayîş berda. La herinda manayen de, ma ganî seba çareserî serê çîyanê ke eşkenê bêrê kerdene de fîkr bikerê. Welatê bingeyîn ê ramitene nika fêqî û zerzevatê xo teber ra ano û komelo ke erdê zo îhmal bikero wextê krîzan de nêşkena xo rayrabero û xo rê besbo û xo bixelêsno. Seba vindarnayîşê koçberî karkeranê demserre, ganî bi rayê şaredarî û kooperatîfan fîdanê berhemê xoverdayîşî (gozî, vame, engure, encîl, zeytûn) bilez dewijan reyde bêrê vilakerdene ke no zî do nêzdîyê 10 serran de ekonomîya herêmê bi temamî bivurno. Eyni wext de, ganî sektorê verênî yê sey mandirayî û hingdarî bi metodanê neweyan bêrê averberdene û vera ferasetê ferdperestî, kulturê kooperatîfanê bi zafşirîkan mîyanê komelî de bêro roniştene. Peynîye de, çimeyê binê erdî û serê erdî ganî bi hişmendîyêka ekolojîke bêrê pawitene; seba qezancanê kilman yê 3-5 serran, nêbeno ke tebîatê herêmê yê 500 serrî bibo qurbanê madenkarîya hove û lîsansanê cayanê neweyan.”
