DBP û Însîyatîfê Yewîyîye yê Demokratîkan serrgêra Roja Kobanî ya Dinya ser o beyanatê nuştekî dayê. Her di sazîye zî beyanatê xo de muhîmîya xoverdayîşê Kobanî ser o bal antê û dîyar kerdî ke xoverdayîşê Kobanî, tarîxê kurd û Kurdistanî de warê şînbîyayîşê yewîyîye yê neteweyî yo.
Ewro Roja Kobanî ya Dinya ya. DAIŞ’î 15ê Êlula 2014î de hêrişê Kobanî kerd. Waşt ke bi paştîya hikûmetê AKP’î Kobanî îşxal bikero. La vera nê hêrişan şervanê kurdan 134 rojî vera DAIŞ’î şer kerd. Nê xoverodayîşê şervananê kurdan bala heme dinya ant. Sereyê vengdayîşê wayîrê Xelata Aştîye ya Nobelî, akademîsyen, roşnvîr, nuştox û rêxistinê komelê demokratîkan, 1ê Teşrîna Peyêne 2014 sey Roja Paştîdayîşê Dinya ya bi Kobanî ameye îlan kerdene. Sereyê naye, temamê dinya de bi taybetî şar, sinif û beşê bindestî û azadîwaştî yê komelî û cinîyê têkoşînkerî bi çalakîyanê tewirbitewiran paştîya xo daye Kobanî û xoverodayîşê Kobanî yo bêemsal. Xoverodayîş, taxe, çeper û kuçeyanê Kobanî ra derbasê heme dinya bi. Heme kuçe û meydanê dinya de, zerî û mezg 1ê Teşrîna Peyêne 2014 de bîyî yew. Japonya ra heta Efxanîstan û Îranî, Latîn Amerîka ra heta Awisturalya, welatanê Ewropa ra heta Rojhelatê Mîyanênî bi yew vengî paştî daye xoverodayîşê Kobanî.
Partîya Herêmanê Demokratîkan (DBP) û Însîyatîfê Yewîyîye yê Demokratîkan serrgêra Roja Kobanî ya Dinya ser o beyanatê nuştekî dayî. Her di sazîye zî beyanatê xo de muhîmîya xoverdayîşê Kobanî ser o bal antê.
Beyanatê DBP’î wina yo
“Kobanî bi heme heqîqetê xo bî manîfestoyê cuya demokratîke!
Sey Partîya Herêmanê Demokratîkan ma 1ê Teşrîna Peyêne Roja Kobanî ya Dinya ya ke bîye sembolê îradeyê cuya azade û xoverdayîşê şaran ê hemparî bi rêzdarî û minet pêşwazî kenê. Xoverdayîşo efsûnî yo ke serra 2014 de hemverê tarîyîya cerganê DAIŞ’î dest pêkerd, bi heme taybetmendîyanê xo konjukturê Rojawanî yê sîyasî û komelkî ser o tesîr keno.
Raywanîya ver bi têkoşînê xoîdarekerdişê cewherî de, averberdişê paradîgmaya cinîya azade de û awankerdişê cuya newe ya demokratîke de Kobanî, şaranê dinya rê bî çimeyê hêz û bawerîye. Xoverdayîşo ke bingeyê xo Manîfestoyê Komelê Demokratîkî yê Birêz Ocalanî ra geno, vera modernîteya kapîtalîste bî adresa serkewtişê modernîteya demokratîke. Bi nê serkewtişî têna seba şarê kurdî nê, seba pêro şaranê bindestan berê modelê cuya newe abîyî.
Hemverê pergalê netewe-dewleto ke erjanê azadîye û demokrasî hedef geno, Rojhelato Mîyanên ewro warê pergalê dermokratîkî de verê vengê termînê newî de yo. Rijîyayîşê rejîmê Baasî û destkewteyê Îdareyê Xoserî yê Bakûr û Rojhelatê Sûrîye nimûneyê şênberî yê na raştî yê. Herinda polîtîkayanê ke sey sînoran erjanê şaran lete kenê, hêvîya vîyartişê demokratîkî her ke şino hêzdar beno. No proseso ke bi xoverdayîşê Kobanî dest pêkerd û bi şorişê Rojawanî vejîya asta newe, ewro seba şaranê Rojhelatê Mîyanênî hele bi hele ameyoxêkê neweyî awan keno. Nê ameyoxî de seba heme bawerîye, kultur, nasname û cîyayîyan azadîye, têduştîye û edalet ca geno.
Coka feraseto ke “xeyalê kewtişê Kobanî kerd” bi serrano bi dewa û muhakemekerdişanê heyfî, bi sîyasetê gef û plananê qilêrinan hewl dano ke hem îradeyê Kobanî û hem zî destkewteyanê şorişî bifetisno. Hemverê na raştîye, ganî wayîrvejîyayîşê Kobanî sey mesuldarîyêka ehlaqî û polîtîke rojeva dinya de bo. No zî encax esasanê raya hîrêyine ser o, bi averberdişê sîyasetê demokratîkî mumkun o. Bi na wesîle ma reyna xoverdayîşê seserre silam kenê û heme şehîdanê ke mohrê xo da tarîx ro bi minet û rêdarî anê xo vîrî.”
Waştişê şaran ameyoxêko demokratîk o
Beyanatê Însîyatîfê Yewîyîye yê Demokratîkan zî wina yo: “Xoverdayîşê Kobanî, tarîxê kurd û Kurdisanî de warê şînbîyayîşê yewîyîye yê netewîye yo. Mehabadî ra hetanî Hewlêrî, Amedî ra hetanî Efrînî, Japonyayî ra hetanî Amerîkaye zerrîya her kurdêkî Kobanî de lerzîyeno. Senî ke Kobanî, vizêr warê vejîya yewîyîye bî, ewro zî têkoşîn û hewla yewîyîya qewetê xo nêzdîbîyayîşê Kobanî û Rojawanî ra gêno. No ser zî pawitişê statuyê Rojawanî nê tena şarê kurd, seba ameyoxê demokratîk o heme şaran waştişêko jêneger o.”
