Kobanî de bi hezaran welatijî bi pêşengîya keyeyanê girewteyan vejîyayê waran û seba serbestveradayîşê gedeyanê xo yê ke destê Hukmatê Demkî yê Sûrîya de yê, rayîrşîyayîşêk girseyî viraşt.
Kobanî de bi pêşengîya keyeyanê girewteyan û sazgehanê komelî yê şaristanî seba waştena serbestveradayîşê girewteyan ê ke destê Hukmatê Demkî yê Sûrîye de yê, rayîrşîyayîşêk girseyî viraşt. Girseye Wareyê Cinîya Azade dest pêkerd, heta Meydanê Aştîye dewam kerd. Rayîrşîyayîş de keyeyan fotografê gedeyanê xo yê girewteyan hewanayê û girseye bêmabên sloganê “Ma girewteyanê xo wazenê” berz kerd.
‘Ganî Şam goreyê peymanê têbigêro’
Badê ke karwanê rayîrşîyayîşî resa Meydanê Aştî, îta de seba vîrardişê şehîdan deqîqeyêk rêz ame girewtene. Dima ra Hemserekê Meslisê Keyeyanê Şehîdan ê Kobanî Mihemed Bozî eşkerayîyêke da û eşkerayî de bale ante serê pêkerdişêko esto û waşt ke bi ca bêro û wina vat: “Heta nika gedeyê ma destê Hukmatê Demkî yê Sûrîya de girewteyê. Goreyê peymana mabênê HSD û Hukmatê Demkî de yê ganî girewteyê ma bilez bêrê veradayene. Ma bi rayberîya xo bawerê û ma zanê ke ey bi şewe û roje seba dosyayê şervananê ma yê girewteyan têkoşîn danê.”
Çalakîya şar û keyeyan, bi berzkerdişê slogananê “Şehîdî Nêmirenê” û “Ma girewteyanê xo wazenê” qedîya. Şarî da zanayene ke heta aqûbeta girewteyan eşkera bibo û ey agêrê keyeyê xo, do çalakîyanê xo dewam bikerê.
