Endam û rayberê Hewldana 78î, bi wesîlayê 49 serrîya Qirkerdişê 1ê Gulana 1977î, Evrazê Kazancî yê Taksîmî de qurbanîyî yad kerdî. Yadkerdişî de ame vatene ke Meydanê Taksîmî vîr û mîrasê qurbanîyan o.
1ê Gulana 1977î de bi hezaran karker û karkerê kede seba “Roşanê Karkeran” Meydanê Taksîmî de kom bîbî. Polîs û leşkeran hêrişê girse kerdbi û nê hêrişî de 34 kesî cuya xo ra bîyê. Nê qewimîyayîşî ra dima 1ê Gulana 1977î sey “Gulana Bigonî” ameye pênasekerdene. Hewldana 78î seba yadkerdişê qurbanîyan Evrazê Kazancî de programêk viraşt. Endam û rayberê sendîka û partîyanê sîyasîyan û zaf kesî beşdarê programî bîyî. Bi seyan kesan qerenfîlî ronayê Evrazê Kazancî ser ke uca de qirkerdiş bibi.
Endamê Hewldana 78î, partîyê sîyasî û dezgehê komelkî Evrazê Kazanci de kom bîyî û pankarto ke ser de “Ma Qirkerdişê 1ê Gulana 1977î xo vîr ra nêkenê” nuştebi, girewt. Eşkerayî nameyê Hewldana 78î ser o hetê Nîmet Tanrikûlû ra ameye wendene.
‘Ma Meydanê Taksîmî fek veranêdanê’
Nîmet Tanrikûlû dîyar kerd ke no Evrazê Kazanci de zaf embazê înan ameyî kîştene û wina vat:“Gonîya embazanê ma tîya de rîşîyaye. Ma embazanê xo nê meydanî de tena nêverdanê. Ma Meydanê Taksîmî ra fek veranêdanê. Çira ma fek veranêdanê? Çunke Taksîm mîrasê embazanê ma yo, Taksîm sembolê têkoşînê ma yo. Seba ke têkoşînê ma binpay bikerê, wazenê Meydanê Taksîmî qedexe bikerê. Labelê nêeşkenê Taksîmî qedexe bikerê.”
Yadkerdiş cayê qirkerdişî de bi ronayîşê qerenfîlan qedîya.
