Komeleya Rojnamegeranê Dîcle Firatê (DFG), rojnameger Seyîd Evranî, ke serra 2023î de cuya xo ra bî, yad kerd.
Komeleya Rojnamegeranê Dîcle Firatî (DFG) hesabê xo yê medyaya dîjîtal ser o, seba vîrardena rojnameger Seyîd Evranî, ke 22ê êlula 2023î de rojavayê Kurdîstanî de cuya xo ra bî, eşkerayîyêk vila kerd.
DFG’yî vilakerdişê xo de bale ante xebatanê Seyîd Evranî yê rojnamegerîye ser o û wina va: “Seyîd Evranî, bi hawayêko fedayî têkoşînê azadîye û demokrasîye ya şarê kurdî, hadîseyanê Kurdîstanî û raştîya şaran resnêne dinya. Seyîd Evranî, ke bi qelem û kameraya xo hadîseyê çar hetanê Kurdîstanî qeyd kerdêni, rojnamegerî tena sey karêk nê, sey wasîtayê verçimkerdena raştîya şaran û şahidîya tarîxî dîyêni.”
‘Ey seba nesle neweyî mîrasêk verda’
DFG’yî dîyar kerd ke Seyîd Evranî tena seba rojnamegerîye nê, seba nesle ameyoxî zî mîrasêko muhîm verdayo û wina domna: “Seyîd Evranî bi rojnamegerîya xo tena seba ewro nê, seba nesle ameyoxî zî mîrasêka muhîm ê şahidî û belgeyan verda. Fotografê ke waranê şerî de antê, xeberê ke nuştê û erjnayîşê ke kerdî, hafizeyêk muhîm derheqê tarîxê nêzdî yê şarê kurdî de awan kerdî.”
‘Wayîrvejîyayîşê mîrasê Seyîd Evranî seba ma berpirsîyarîye ya’
DFG’yî tewr peyên dîyar kerd ke şopnayîşê mîrasê Seyîd Evranî seba înan berpirsîyarîyêk o û eşkerayîya xo wina qedêna: “Ganî verdayena vîrardena ey, wayîrvejîyayîşê mîrasê rojnamegerîye yê ke ey pey xo verda û dewamkerdena pawitena raştîye, seba ma berpirsîyarîyêk a. Vîrardena Seyîd Evranî do mîyanê raştîyanê ke bi qelem û kameraya xo qeyd kerdî do têkoşînê şarê Kurdî de bicuyo û dewam bikero.”
