Serrgêra qirkerdîşê Zinî de kesê ke koye Munzûrî de seba vîrardişê ameyê têlewe, 1938 de 97 kesê ke ameye kiştene yad kerdî û qiseykerdişan de ame vatene: “Qirkerdîşe Zînî û Koçgirî sey jûbînî yê, ma sekerd ke ma qirkerdî ?”
Dewlete 1938î de, Dewanê Erzinganî Surbahan, Kiliçkaya, Balibey, Girlevik, Kismikor, Magaçûr û dewanê dorûverê înan, 97 dewijê berdê Newala Zinî (Zînî Gedîgî) de qir kerdî. Seba na qirkerdene, her serre Şare Erzingan, Fransa û Almanya ra xeylî welatijî yene têlewe, şonê Newala Zînî de jû roje manenê, kesê ke ameyê qirkerdene yad kenê. Erdal Kiliçkaya dewa Kiliçkaya ra yo, cuya xo Fransa de rameno, Çinar Koçgirî cuya xo Koçgirî de rameno. Nê her di kesî tewrê yadkerdişê Zînî bîyî û ajansê ma rê qisey kerd.
‘Şarê ma bêguna bî’
Erdal Kiliçkaya seba qirkerdîşe Zinî wina vat: “Şarê ma 97î keşî, arde têlewe, hîrê roj û hîrê şewî vêsan û têsan mendî, tepa berdê Newala Zînî de qir kerdê. Şarê ma sekerd ke pêrûne kiştî. Şarê ma nêzanayenê ke guneye xo çi bî. Ma dewlete rê vanîme ke, sima çira wina kerd ma ra vajê. 15 serrî yo ke ma yenê Newala Zinî, înan yad kenime, nîyaz vila kenê çilaye xo vesnenîme.”
‘Qomê ma xeylê qirkerdişî dîyê’
Çinar Koçgirî seba qirkerdîşê Koçgirî û Zinî qisey kerd û wina vat: ”Koçgirî ra ez ameya tîya. Îta mabênê Erzingan û Dêrsimî yo. Şar her serre seba yad kerdena Qirkerdişê Zînî yeno tîya. Ma şarê Koçgîrî yê sey Qirkerdişê Zînî ma dîyî. Hetê ke ra ma Koçgîrî yad kenê hetê ke ra zî Qirkerdişê Zînî yad kenê. Qomê ma no gilê koyî de qirkerd. Ma yenê îta de loqme vila kenê, seba înan çila vêsnayîme.”
Kesê ke tewrê programê yadkerdişî bîyî waşt ke seba Qirkerdişê Zînî têrîameyîş bibo.
