Hemserekê MED TUHAD’î Kerem Canpolast bale ant rewşa girewteyanê nêweşan û dîyar kerd ke ganî 70 girewteyê nêweşî ke rewşa înan giran a, bi lez veradîyê.
Gorê daneyanê. MED TUHAD-FED û OHD’yî 631 girewteyê nêweşî est ê û 400 girewteyê ke cezaya muebedo girankerde înan rê ameya dayene zî bi serran o hucreyanê yewkesî de yenê girewtene. Goreyê raporê Komela Heqanê Merdiman (ÎHD) ke 28ê nîsana 2025î de Amed de eşkere kerd, hezar û 412 girewteyê nêweşî est ê. Nê girewteyan ra 230 girewteyê ke nêweşîya înan giran a û nêeşkenê tena biciwîyê.
Derheqê babete de Hemserekê Federasyonê Komela Huqûq û Piştgirîye ya Keyeyanê Girewte û Hukumwerdoxan reyde ê Medî (MED TUHAD-FED) Kerem Canpolat Ajansê ma rê qisey kerd.
‘Zere de girewteyan rê teber de zî keyeyan rê îşkence kenê’
Kerem Canpolat şert û mercanê girewteyan ser o vindert û vat: “Hepisxaneyan de binpaykerdişê heqan zaf ê. Tewr zêde hetê weşîye de problemê girdî est ê. Dewlet girewteyanê sîyasîyan ra vêşêr nêzdîyê girewteyê sîyasî yê nêweşan ser o vindena. Girewteyê nêweşî zaf ê, la nêzdîyê 70 girewteyê ke nêweşîyê înan zaf giran ê û mîyanê şert û mercanê hepisxaneyan de nêeşkenê cuya xo bidomnê, est ê. Nê girewteyê nêweşî raporê înan ê nêeşkenê hepisxaneyan de bimanê est ê la çi heyf ke wexto ke şonê tibê edlî hemverê înan raporan amade kenê û vanê nê kesî eşkenê hepisxane de biamnê. Dewlete û îdareyê hepisxaneyan zî vatişanê tibê edlî xo rê esas gênê. Nê çîyî pêro sîyasî yê, wazenê îradeyê înan bişiknê û merdimîye û cuya merdimîye bikerê bin payanê xo. Zere de girewteyan rê teber de keyeyan rê îşkence kenê. Tewr peyên Mustafa Karatepe 30 serrî ra pey bi nêweşîya giran veradîya la çi heyf ke cuya xo vîndî kerde. No binpaykerdişê merdimîye yo. Xeylê girewteyî est ê ke wexto ke 2 aşmî maneno zanê ke xo ser o nîyê, nêweşîya înan giran a û hişê xo vîndî kerdo, dima veradîyenê. Hêvî waştişê ma o yo ke nê girewteyî bi lez veradîyê û nê polîtîkayan ra fek veradê.”
‘Amancê ma o yo ke ma vengê heme girewteyan biresnê komîsyonê meclîsî’
Hemsereke Kerem Canpolat dîyar kerd ke sey Federasyonê Komelanê Huqûq û û Piştgirîye ya Keyeyanê Girewte û Hukumwerdoxan reyde ê Medî (MED TUHAD-FED) û Komela Heqanê Merdiman (ÎHD), avukat, huqûqnasî bi taybetî rewşa girewteyanê nêweşan ser o vindenê û qiseykerdişê xo wina doman: “Seba na babete ma pîya komîsyonêk awan kerdo. Waştişê ma o yo ke ma raporanê girewteyanê nêweşan kom bikerê û no komîsyono ke me awan kerdo, ey de bikerê yew. Sere de nê raporan komelanê ke merdimîye pawenê, demokrat û sazgehanê sîvîlan reyde pare bikerê. Parekerdişan ra pey ma wazenê nê raporan dewlete, huqûqnas û doktor û sazgehanê demokrat ê Ewropa reyde pare bikerê. Çalakîya ma dewam kenê her tim, ma her tim amadekarîya xo kenê seba çalakîyan û amancêkê ma zî o yo ke vengê girewteyan û heme girewteyanê sîyasîyan biresnê Komîsyono ke Meclîsê Tirkîya de ameyo awankerdene û înan reyde pêvînayîşan bikerê. Dima raporê ke ma amade kerdê, înan reyde pare bikerê.”
