KCKyî kadroyanê awankerdox ê PKK’yî ra Fuat (Alî Haydar Kaytan) serrgêra şehadetê ey a 8. de bi hurmet yad kerd û wina vat: “Heval Fuat do her tim zerrîya têkoşîn û şarê ma de biciwîyo. Têkoşînê ey do bibo têkoşînê ma.”
Hemserekîya Konseya Rayraberdişî ya KCK’yî bi munasebetê serrgêra şehadetê kadroyanê awankerdox ê PKK’yî ra Fuat (Alî Haydar Kaytan) ya 8. mesajêk pare kerd û wina vat: “Serrgêra şehadetê heval Fuat (Alî Haydar Kaytan) ya 8. a. Ma awankerdoxanê grûba Apoyî û embazê 50 serran ê Rayber Apo ra heval Fuat bi hurmet û minetdarî yad kenê û sozê xo yê seba caardişê waştişanê ey reyna tekrar kenî.”
Mesajê KCK’yî wina dewam kerd:
“Heval Fuat serra 1983î de seba ke şerê gerîla bidê destpêkerdene, vejîya serê koyanê ke mîyanê heme tarîxî de do şarê kurdî bipawê; koyan de ke tira zaf hes kerdêne, 3yê temmuza 2018î de şehîd bi.
Heval Fuat kombîyayîşê Awbendê Çubukî ra dest pêkerd û bi taqîbkerdêko biisrar ê xeta têkoşînê Rayber Apo. Seba ke şorişgirtîya pîl û kesayetê pêşeng ê Rayber Apoyî heme awankerdexoanê rêxistine û embazan rê vajo, cehdê zaf pîlî dayî. Sey embazêko ke rastîya Rayberîye tewr rind fam kerda û vano, mîyanê Têgêrayîşê Azadîye de seba averşîyayîşê xeta fedaîtîye berpirsîyarîyêka muhîme girewte xo ser. Nê semedî ra vat Rayber Apo vat, ‘Embazo ke mi, mi ra zafêr mi fam keno û vano’, cayê ey ê mîyanê têkoşînê ma yê azadîye de mojna.
Heval Fuat sey lajê keyeyêko ke zilmê qirkerdişê Dêrsimî yê 1937-38î reyde rî bi rî mendo, bi eşnawitişê nê zilme pîl bîyo. Hêrsê ey ê hemverê nê zilmî de ey kerd welatperwer û şorişgirêkê pîl. O semed ra her tim vatêne, merdimê ke zilmê serê şarê kurdî mezg û zerrîya xo de hîs kenî, do bibî welatperwer û şorişgirê pîl. Heval Fuat şaîrêko winasîn bi ke pîvanê ey ê redkerdiş û qebulkerdişî berz bîyî. Mîyanê şîîranê xo de heskerdişê xo yê seba kurdan û Kurdîstanî dîyar kerd; hêrsê hemverê zilmî zî bi hîsanê zaf xurt mojna.
Heval Fuat seba perwerdekerdişê kadroyanê Têgêrayîşê ma yê Azadîye û şarê kurdî berpirsîyarîyêka muhîme girewt xo ser. Seba felsefeyê azadîye û demokrasîye bi rengêko xurt bimojno û nê hîmî ser o qerardarî û îradeyê têkoşînî aver bero, cehdêko zaf pîl mojnayo. Bi nê cehdanê xo sey embazêko ke ke hîsê Têgêrayîşê Azadîye xurt kerdî û dayê domnayene û averşîyayîşê têkoşînî de Rayber Apo tewr baş fam kerd, wezîfeyêka tarîxî ard ca.
Erjnayîşê heval Fuat ê bi hezaran pelî est î ke rastîya Rayberîye, PKK’yî, xebata azadîye, xeta azadîya cinîyan, rastîya komelê Kurdîstanî û Dêrsimî vanî. Nê çîyê ke nuştî, do tîya ra pey zî seba perwerdekerdişê Têgêrayîşê Azadîye û şarê ma rolêko muhîm kay bikerê.
Heval Fuat nê hîmî ser o ke rastîya Kurdîstanî bi hawayêko xorîn fam bikero, rastîya tarîxî ya Dêrsimî û çîyê ke Dêrsim de qewimîyayî, bi hawayêko xorîn erjnayî. Seba merdim çîyê ke mîyanê tarîxî de Dêrsim de qewimîyayî û qirkerdişê 1937-38î fam bikero, ganî heval Fuatî fam bikero. Heme çîyê ke tarîx de ameyî serê Dêrsimî, mîyanê nasname û kesayetê xo de şênber kerdî. Nê bingeyê ser o cuya heval Fuat, seba ke ruhê azadîye yê komelpawitox ê tarîxê Dêrsimî mîyanê azadîya Kurdîstanî de bêro ca, beno vengê berzkerdişê têkoşînî.
Ma do her tim venganeya heval Fuatî hîs bikerî. Ma do na vengane zî bi hesret û hîsanê ey û bi berzkerdişê têkoşînî pirr bikerî. Heval Fuat do her tim zerrîya xebata ma ya azadîye û zerrîya şarê ma de biciwîyo. Hesretê ey do bibî hesretê ma, têkoşînê ey do bibo têkoşînê ma.”
