Komîteyê Têkilîyanê Teberî yê KCK’yî derheqê hêrîşan de ke Heleb de dewam kenê eşkerayî daye û venga heme hêzanê sîyasîyan da ke seba caardişê peymana 10ê adare cehd bikerê û agêrê masa ser.
Eşkerayî de ame vatene ke demêk de ke Tirkîya de Prosesê Aştî û Komelê Demokratîkî yeno munaqeşekerdene û heyetê rayberîya Vakur û Rojhelatê Sûrîye û Hukmatê Demkî yê Şamî pêvînayîşan kenê, destpêkerdişê hêrîşanê Helebî rewşêka cîdî ya.
KCK’yî vat ke hêrîşê ke hêzê çekdarî yê girêdayeyê Hukmatê Şamî taxanê Şêxmeqsûd û Eşrefîye yê Helebî ser o kenê rasterast kurdan hedef gênê. KCK’yî îfade kerd ke nê hêrîşî cehdêk ê ke ameyoxê şaro ereb ê Helebî, şaran û komelanê Sûrîye tehdît keno.
KCK’yî vat: “Kurdê Helebî bi serran o vera hêrîşanê zaf grûbanê çeteyan ê faşîstan ke sere de DAÎŞ bedelanê giranan danê û xover danê, zanê xo bipawê. Hêrîşê kurdan ser o bi hedefê koçberîya bizorî yê şarê Şêxmeqsûd û Eşrefîye, Heleb ra pakkerdişê kurdan û tahrîkê nakokîya ereb-kurdan o.”
Eşkerayî de venga heme hêzanê sîyasîyan ame dayene ke seba caardişê peymana 10ê adare cehdanê xo bidomnê û venga heme hêzanê mîyannetewîyan ame dayene ke Sûrîye de aştî û îstîqrar wazenê, seba agirbestî rolê xo bigîrê xo ser.
