KCK’yî gama Projeyê Neteweyî yê seba Yewîya Şarê Kurdî ke Başûrê Kurdîstanî de ame destpêkerdene, silam kerd û piştgirîya xo îfade kerd. KCK’yî veng da têgêrayîşanê cinî û ciwanan, heme bawerî û beşanê komelkî yê Kurdîstanî, partî, hunermend, roşnvîr, akademîsyen û bi kilmkî veng da her kesî ke xeta welatperwerî de yê, bi piştgirîyêka gird beşdarê vengdayîşê yewîya neteweyî bibê.
Bi sloganê “Yek e yek e yek e, gelê Kurd yek e” hetê zafêrê 200 kesayetanê cîya yê Başûrê Kurdîstanî ra projeyêko neteweyî amebi destpêkerdene. Komîteya Têkilîyanê Teberî ya KCK’yî derheqê na game de eşkerayîyêk vila kerd.
Eşkerayîya KCK’yî wina ya:
“Ma coşê şarê xo yo bi heybet ke bi sloganê ‘Rayber Apo rê Azadîye û Yewîya Demokratîk a Kurdan’ herikîyayê qadanê Newroze silam kenê û ma reyna Newroza Rayber Apo û şarê Kurdî pîroz kenê.
Prosesî de ke Kurdîstan û Rojhelatê Mîyanênî de hedîseyê zaf krîtîkî qewimîyenê, eşkerayîya Projeyê Pêameyîşo Neteweyî ke Başûrê Kurdîstanî de hetê zafêrê 200 kesayetanê naskerdeyan ra seba yewîya demokratîk a kurdan ame amadekerdene, cehdêko zaf bi mana, muhîm û biqîmet o. Ma sey têgêrayîş na eşkerayîya ke zafêrê 200 kesayetan bi ked, cehd û zîhnîyetê berpirsîyarî mojnayo silam kenê û zerrî ra paştî danê ci. Nê bingeyê ser o ma sere de dîyar kenê ke ma do her tewir wezîfe û berpirsîyarîyî ke kewenê milê ma ser bi waştiş û qerardarîyêka girde bîyarê ca.
Na rastîyêk a ke şarê kurd tarîxî fe xeylê serewedaritox, xoverdayox, bicesaret û dejantox bîyo. La rîyê polîtîkayanê înkar, asîmîlasyon, zilm û ‘parçe bike û rayra bere’ yê ke hêzan Kurdîstan ser o rayra berdê, bi taybetî zî rîyê parçekerdişo tarîxî û çinbîyayîşê yewîye, înan nêşinayo serewedaritiş û têkoşînê xo yo heqdar serkewtiş reyde biqedinê. La seba şarê ma êdî demê bedilnayîşê no qedero sîya ameyo. Hem çî êdî ma rê yewîya demokratîk a zereyî ferz keno.
Bi zîhnîyeto tarîxî kurdan aşmanê peyênan de çar hetanê Kurdîstan û teberê welatî dde muhîmîya yewîya neteweyî îfade kerd. Şarê kurdî mecbur o ke yewîya xo ya demokratîk a ke tarîxî ma rê ferz kerda, garantî bikerê û xo biresnê statuyê cuya azade û demokratîk.
Herkesî ra ver têgêrayîşê cinî û ciwanan, heme bawerî û beşê komelkî yê Kurdîstanî, partî, hunermend, roşnvîr, akademîsyen û bi kilmkî herkeso ke xeta welatperwerî de yo, seba vengdayîşê neteweyî beşdarî û piştgirîyêka pîle bimojnê. Ma sey têgêrayîş reyna dîyar kenê ke sey her wextî, ma do ewro û ameyoxî de zî na babete de wayîrê rolêko awanker, piştîdayox û asanker bê û wezîfeyê ke kewenê milê ma ser ma do bîyarê ca. Ma grûba Vengdayîşê Pêameyîşê Neteweyî reyna silam kenê.”
