Xalê Ehmed 30 serrî yo ke kameraya xo sey çekêk girewta, şaristan bi şaristan, dewe bi dewe û zozan bi zozan gêreno, kulturo kehen ê kurdan qeyd keno û pare keno.
Mîyanê koyanê berz ê Kurdîstanî de, dewanê kehen û zozananê renginan de, vengêko qedîm her tim gulbang dano û vila beno. Vengê dengbêjan, estanekvatoxan û deyîrê gelerî yê ke tarîxê komelêkê pawenê. Xalê Ehmed 30 serrî ra zafêr o e kameraya xo sey çekêk girewta, şaristan bi şaristan, dewe bi dewe û zozan bi zozan gêreno, kulturo kehen ê kurdan qeyd keno û pare keno.
Arşîvêko rengin
Xebata ey a zengîne tena dîmenê rengin nîyê, vîrê komelê kurdan o ke vera înkar û asîmîlasyonî wirzeno. Mîyanê nê 30 serran de o bi hezaran kîlometre rayîr şîyo, şîyo hetê dengbêjanê verên ê dewanê dûrî, estanekvatoxî ke tarîxo fekî yê kurdan pawenê û heme bi kameraya xo qeyd kerdê. Nê vîdeoyan de xeylê dengbêjî estê ke cuya xo vîndî kerda. Deyîrê verên ê eşq, şer, koçberî û tarîxê kurdan ser o vanê ke sey arşîvêko gandar yenê pawitene.
Têkoşînê vera asîmîlasyonî
Na raywanîya Xalê Ehmedî tena gêrayîşêk bîyo, helbet vera polîtîkayanê asîmîlasyonî yê dewleta Tirkîya têkoşînêk o. Vîdeoyanê ey de renginîya Kurdîstanî dîyar bena. Koyanê Zagrosî ra bigîrê heta zozananê başûrê Kurdîstanî, dewanê kehen ê Amedî ra bigîre heta Koyê Şengalî. Ey tena dengbêjî qey nêkerdê. Eynê wextî de ey cuya rojane ya kurdan, deyîrê gelêrî, rîtuelê verên û peyzajê xozayî yê bêemsalî zî belge kerdê.
Vengê şarê kurdî
Xalê Ehmed bi na xebate, tena kulturî nêpaweno. O eynê wextî de azanê neweyan teşwîq keno ke wayîrê mîrasê xo vejîyê. Demêko winasîn ke medya dîjîtale heme çî bedilnena, kanalê ey bîyo mabênê demo verên û newe de bîyo pird. Kameraya ey tena vîdeo nêgêna, eynê wextî de vengê şarê kurdî ke wazeno biciwîyo, ey zî qeyde kena. No têkoşînê ey o 30 serrî, ewro zî dewam keno û no tena arşîv nîyo, no vatişê “Ma est ê” yo.
Xalê Ehmed nê eşqê komkerdişê dengbêjî û dengbêjan bi vatişê “Ez vera polîtîkayanê asîmîlasyonî yê vera kulturê kurdan, pawitişê kultur û hunerî kurdî kena” cewherê amancê gêrayîşê xo îfade keno.
