Îsraîl û Lubnanî bi mabênkarîya DYA Washîngton de pêvînayîş kerd. Badê pêvînayîşî, caardişê adirbestî ser o pêkerd. Îsraîlî adirbest bi şertê bêçekkerdişê Hîzbullahî qebul kerd.
Badê pêvînayîşê di rojan ê mabenkarîya Dewletanê Yewbîyayeyan ê Amerîka (DYA), Îsraîl û Lubnanî caardişê adirbestî ser o pêkerd. Eşkerayîye hempar a badê pêvînayîşî de ame dîyarkerdene ke caardişê adirbestî vindarnayişê heme hêrişan û xoantişê endamanê rêxistinê herêmanê başûrî Çemê Lîtanîyê girêdayeyo. Eşkerayîye bi îmzeyanê hempar ê temsîlkarê DYA, Îsraîl û Lubanî ame weşanayene.
Tûrê newe yê muzakereyê 22yê hezîrane yo
Sewbîna heme hetan seba çareserîyêka domdare do 22yê hezîrane de tûrêko bin ê muzakereyan virazê. Eşkerayîya hempare de ame dîyarkerdene ke amancê pêvînayîşan “xo resnayîşê peymanêka şumûldar a” û ame vatene ke seba pêameyîşêko domdar û dergûdila yê herême, do cehdê dîplomatîkî dewam bikerê.
Îsraîlî ra şertê bêçekkerdişê Hîzbullahî
Eşkerayîya hempar de ke badê pêvînayîşanê Washîngtonî ameye weşanayene, seba pozîsyonê Îsraîlî zî ca ame dayene. Îsraîlî îdia kerd ke ewleyîya welatê înan tena bêçekkerdişê Hîzbullahî û vilakerdişê hêzê ey o leşkerî yê Lubnanî beno. Sewbîna Îsraîlî, seba çareserî û dewamkerdişê dayîşûgirewtişan çimdarîya DYA’yî waşt.
Rixmê dayîşûgirewtişanê adirbestî, hêrişî dewam keno
Rixmê cehdanê dîplomatîk, hêrişê Îsraîlî Lubnanî ser o dewam kenê. Ajansê xeberan ê Mîyanneteweyî yê Lubnanî eşkera kerd ke Îsraîlî, herêma Zebdîn ya şaristanê Nebatîye de hêrişê ambulansêk kerd. Goreyê Wezaretê Weşîye yê Lubnanî, hêrişî de xebatkarêkê weşîye cuya xo ra bi û kesêk zî birîndar bi. Berpirsîyaran dîyar kerd ke mîyanê 24 saetanê peyênan de vera xebatkaranê weşîye hêrişo 4. ameyo kerdene.
Hûmara merdeyan zêde bena
Ame eşkerakerdene, ambulansa ke ameya hedef girewtiş, yê Komîteya Weşîya Îslamî ya girêdayeya Hîzbullahî bî. Wezaretê Weşîye yê Lubnanî dîyar kerd ke hêrişanê Îsraîlî yê 24 saetanê peyênan da 48 kesî cuya xo ra bîyî û 97 kesî zî birîndar bîyî.
