Endamanê ÎHD’yî kombîyayîş de waştişê xo pêşkêş kerdî û dîyar kerd ke ganî Komîsyon cade Rayberê Şarê Kurdî Abdullah Ocalanî de pêvînayîş bikero. Temsîlkaranê komele û weqfan zî vat ke ganî dewlete netîceyanê şîdetî de têrî biba.
Vizêr kombîyayîşê Komîsyonê Demokrasî, Wayûbirayîye û Paştdayîşê Milîyî yê Meclîsî de îdarekaranê Komeleya Heqanê Merdiman (ÎHD) qisey kerd.
Hêverî Hemserekê ÎHD’yî Huseyîn Kuçukbalanî qisey kerd û pare kerd ke ganî Komîsyon Rayberê Şarê Kurdî Abdullah Ocalanî de pêvînayîş bikero, ganî Koma Haştîye û Komelê Demokratîkî ya ke çekê xo vêşnabî, Komîsyon de cabigêra.
Endama Heyetê Rayberdişê Merkezî yê ÎHD’yî Vetha Aydin Yuksele ard ziwan ke ê wazenê tewrê komîsyonî bibê.
Dima Hemserekê ÎHD’yî yê Amedî Ercan Yilmazî waştişê înan rêz kerdî. Waştişê ÎHD’yî wina yê: Seba gerîlayanê ke çekî war verdayê qanûnî virazîyê û nê kesî entegreyê komelî bibê.
-Wa cayê goranê serkêşanê kurdan ê sey Şêx Seîd, Seyîd Riza û Saîdê Nûrsîyî bêrê eşkerakerdene.
-Wa perwerdeyê bi ziwanê dayîke bêro caardene.
-Wa qanûnê qeyûman wedarîyo û şertê xoserîye yê îdareyê herêmîyî bêro caardene.
-Wa Qanûnê Têkoşînê Vera Terorî (TMK) wedarîyê.
-Heqê hêvîye wa bêro caardene.
Serekê MAZLUM-DERî Kaya Kartalî îfade kerd ke ganî dewlete netîceyanê şerî, pêkewtişan û şîdetî de têrî biba.
Serekê Weqfa Heqanê Merdiman a Tahîr Elçîyî Mahsum Batiyî da zanayene ke ganî polîtîkayê bêcezaverdayîşî wedarîyê.
Serekê Weqfa Heqan û Azadîyanê Merdiman û Hetkarîya Merdimatîye Fehmî Bulent Yildirimî zî dîyar kerd ke ê do paştî bidê prosesî.
