Îdrîs Balukenê ke têhetameyîşê şarî yê Wuppertalî de qisey kerd, vat şarê kurdî polîtîkayê înkarî betal kerdî û prosesê haştîye kewt merhaleya stratejîke.
Bajarê Wuppertalî yê Almanya de çarçewaya “Vengdayîşê Haştîye û Komelê Demokratîkî” yê Rayberê Şarê Kurdî Abdullah Ocalanî de têhetameyîşê şarî ame organîzekerdene. Sîyasetmedar Dr. Îdrîs Baluken sey qiseykerdoxî tewrê kombîyayîşî bi.
Îdrîs Balukenî ard ziwan ke şarê kurdî polîtîkayê înkarî betal kerdî û no her hetî ra ame vînayene û vat, “Şarê kurdî warê tarîxî de pelo newe akerd.” Balukenî bale ante vengdayîşê Rayberê Şarê Kurdî Abdullah Ocalanî yê 27ê sibate ser û nê vatî: “No vengdayîş têna semedê partîyêk nêbi, semedê kurdan proseso stratejik da destpêkerdene. Perspektîfê çareserîye yê Ocalanî yê 30 serran ewro resayî merhaleya muxatabîye. No netîceyê têkoşînê seserran ê şarê kurdî yo. Nika semedê haştîye firsetêko gird est o la têna bi hetê kurdan nêbeno, gerek muxatap zî vera nê îradeyê cewabo ke hewce keno bidê. Têkoşînê kurdan hinî stratejîya sîyasî, komelkî û demokratîk a ke ameyoxî înşa kena.”
