Seba serrgêra 4. ya şorişê “Cinî Cuye Azadîye”, Almanya de nawitgehêk eseranê destan ke hetê girewteyanê cinî yê sîyasî yê Îranî ra ameyê viraştene, ame akerdene. No nawitgeh do hîrê rojî dewam bikero.
Galerîya Einstein Kultur a şaristanê Munîhî yê Almanya de seba serrgêra 4. ya kiştena Jîna Emînî û destpêkerdişê şorişê “Cinî Cuye Azadîye”, bi pêşengîya Muzeya Têgêrayîşê Cinîyanê Şaranê Îranî nawitgehêk hunerî ya bi nameyê “Ji Evînî ber bi hezkerdişî” ame akerdene.
Nawitgehî de eserê destan ê 10 serranê vîyarteyan, ke hetê girewteyanê cinî yê sîyasî yê sey Nêrgiz Mihemedî, Nesrîn Stude, Meryem Ekberî Muneferîd û Leyla Hisên Zade ra hepîsxaneyanê Îranî de ameyê viraştene, ameyê mojnayene. Eserê ke ameyê viraştene, bi çîyî û îmkananê zereyê hepîsxaneyî ameyê viraştene. Nawitgeh do hîrê rojî akerde bimano.
Nawitgehî de Endama Parlamentoya Ewropayî Hannah Neumane qiseykerd û dîyar kerd ke ciwananê şaranê Îranî vurnayîşî caard û do rejîmî brijnê. Aye îfade kerd ke wezîfeyê sîyasetmedaran o yo ke piştîdayîşê serewedaritişê şarî bikerê û gumanbaran vejê vernîya mehkema.
