TJA û Meclîsê Cinîyan ê DEM Partî, seba serrgêra 4. ya kiştena Jîna Emînî eşkerayîyêk da û dîyar kerd ke destbendkerdiş, girewtiş, cezaya giran û tehdîdê dardekerdişî hîna zî ciwîyayîşê cinîyan dorpêç kena û wina ame vatene: “Rejîmo ke nêeşkeno xoverdayîşî bişikno, wazeno cinîyan bêveng bikero. Çar serrî verê nika, o vatişo ke kuçeyanê Îranî ra dinya de vila bîyo, ewro zî têkoşînê hempar ê cinîyan de cuyeno.”
Cinîya kurde, Jîna Emînî, 12ê êlula 2022î de Tehranî de, semedo ke porê aye asayone, hetê “Polîsanê Exlaqî” yê rejîmê Îranî ra ame destbendkerdene û 16ê êlule de zî îşkenceyî ver, cuya xo ra bî. Têgêrayîşê Cinîyanê Azad (TJA) û Meclîsê Cinîyan ê DEM Partî, semedê serrgêra 4.ya kiştena Jîna Emînî, Îstanbol de Meydanê Şîşhaneyî de eşkerayîyêk da. Aktîvîstê TJA’yî, Dayikê Aştîye, parlamenter, endam û rayberê DEM Partî, temsîlkaranê sazgehanê komelkî û xeylî cinîyî tewrê eşkerayîye bîy. Eşkerayîye hetê endama enstîtuya Kurdî Rojbîn Dagî ra ame wendene. Eşkerayîye de pankartê “Cinî Cuye Azadîye” ame akerdene û sloganê “Cinî Cuye Azadîye” ame berzkerdene.
Rojbîn Dagî dîyar kerd ke 16ê êlula 2022î de Îran de, Jîna Mehsa Emînî, bi maneya ke porê xo goreyê qaydeyanê serepêşnayîşî nêpoşto, hetê “Polîsanê Exlaqî” yê rejîmî ra ame destbendkerdene û kiştene û wina va: “Vengê Cinî, Cuye, Azadîye, ke pey kiştena Jîna berz bi, demêko kilm de sînoran ra vîyart û bi vatişêko hempar ê seba waştişê azadîye yê cinîyanê seraserê dînya de.
Sewbîna merdena Jîna bi destpêkê şiknayîşêko tarîxî vera zextê ke leşe, nasname, şeklê cuyayîşî û azadîya cinîyan ser o ameyê awankerdene. Serewedaritişê ke Îranî de bi pêşengîya cinîyan kewt mîyanê kuçeyan, o serewedaritiş bî xoverdayîşêko biqewet vera sîstemê serdestîyê camêrdan ê ke hewl danê hukmê înan qerarê cinîyan ser o bibo ke cinî do senîn bicuyê, çi xo ra dê, bi kamcî ziwanî qisey bikerê û cuyayîşê xo ser o kamcî qerarî bigêrê.”
‘Serra 2026î de tewr tayê 19 cinî ameyê dardakerdene’
Rojbîn Dagî îfade kerd ke mîyanê têkoşînê Cinî, Cuye, Azadîye de zext û tacîzî nêqedîyenê û wina domna: “Destbendkerdiş, girewtiş, cezayê giran û tehdîtê dardekerdişî hema zî cuyayîşê cinîyan dorpêç keno. Rejîmo ke nêeşkeno xoverrodayîşî bişikno, wazeno cinîyan bêveng bikero; caardişê dardakerdene sey wesayîtê tersnayîş vera têkoşînê cinîyan xebitneno. Îradeyê cinîyan o ke badê Jîna vatibi “Cinî, Cuye, Azadîye” û weriştibî lingan ser, ê wazenê ke o îrade bi destbendkerdiş, îşkence, cezayê hepîsxaneyê yê giranî û tehdîtê dardekerdişê teslîm bigêrê. Vera nê polîtîkayanê ke heqê cuyayîşî yê cinîyan kenê hedef, heme cinîyê ke ameyê dardekerdene û ê ke binê tehdîtê dardekerdîşî de yê, ma têkoşînê înan pêrine sey têkoşînê xo hesibnenê. Raporo tewr peyên yê heqê merdiman ke derheqê cezayanê dardekerdişî yê çalakîker û muxalîfan de yo, o zî mojneno ke no tablo dewam keno. Destpêke de zî rojnamegêr Pexşan Ezîzî, ewro hema zî xeylî cinî bi nê hêrişan yenê hedefgirewtene. Goreyê agahîyanê Sazgehê Heqê Merdiman ê Îranî, ma zanê ke serra 2026î de tewr tayê 19 cinî ameyê dardekerdene û bi desan, bi seyan cinî zî hema bi tehdîtê dardekerdişî rê rî bi rî yê. Vera nê tehdîtan, seraserê dinya de ganî cinî dest bidê yewbînan û seba ke tu cinî nêro kiştene, ganî xo rêxistin bikerê.”
‘Cinî Cuye Azadîye tena slogan nîyo’
Sewbîna Rojbîn Dagî dîyar kerd ke înan Jîna Mehsa Emînî xo vîr ra nêkerda û qiseykerdena xo wina qedêna: “Sîstemê serdestîyê camêrdan ke wazeno leşe, nasname û cuyayîşê cinîyan bikero binê kontrola xo, vera nê sîsteman ma cinî do têkoşînê xo yê rêxistinî gird bikerê. Cinî, Cuye, Azadîye ke badê Jîna kuçeyan de veng da, tena slogan nîyo; sewbîna vejîyayîşê îradeyê cinîyan o ke cinî cuyayîş û ameyoxê xo ser o wayîrê vatiş û qerarî bibo. Çar serrî verê nika, o vatişo ke kuçeyenê Îranî ra dinya de vila bîyo, ewro zî têkoşînê hempar ê cinîyan de cuyeno.”
Çalakî bi sloganê “Cinî Cuye Azadîye” qedîya.
