Anqara – Goreyê agahîyanê ke çimeyanê DEM Partî ra ameyê girewtene, Rayberê Şarê Kurdî Abdullah Ocalanî pêvînayîşê peyênî de serê hedîseyanê Rojava de, munaqeşeyê serê Elewîyan û rewşa Îranî de erjnayîşê muhîmî kerdê. Abdullah Ocalanî hedîseyê Rojava sey provakasyon erjnayê û ard ziwan ke ganî sabotajê vera zemînê dîyalogî bêmabên bêrê vindarnayene.
Rayberê Şarê Kurdî Abdullah Ocalanî tewr peyên 13ê êlule de heyetê DEM Partî yê Îmralîyî ya ke parlamenteran Pervîn Buldan, Mîthat Sancar û avûqat Faîk Ozgur Erolî yeno pê, Girawa Îmralîyî de yew pêvînayîş kerd. Ame zanayene ke Rayberê Şarê Kurdî Abdullah Ocalanî pêvînayîşê peyênî yê heyetî reyde serê hedîseyanê Rojava, munaqeşeyê serê Elewîyan, dardekerdişanê Îranî û tedayê rejîmî yê serê Kurdan de erjnayîşê hîrayî kerdê.
‘Ganî provakasyonê Rojava bêmabên bêrê vindarnayene’
Ame dîyarkerdiş ke Rayberê Şarê Kurdî Abdullah Ocalanî pêvînayîş de serê qetilkerdişê Şerwanê Tugaya Hesekê Sîpan Hiznî û hedîseyanê ke Rojava de qewimîyayê zî erjnayîş kerdo. Ame parekerdene ke Rayberê Şarê Kurdî Abdullah Ocalanî averşîyayîşê ke Rojawan de qewimîyayê sey provakasyon name kerdê û wina vato: “Şima do yew ciwan bi hewayêko wehşîyane qetil bikerê û dima ra zî bikerê mane ke bikewê şaristan. No provakasyonêk o. Gerek nê sabotajê vera zemînê dîyalogî bêmabên bêrê vindarnayene.”
Erjnayîşê serê munaqeşeyê elewîyan
Çimeyanê ke pê bawer yê mîyanê prosesî de yê dîyar kerd ke Rayberê Şarê Kurdî serê endîşeyê elewîyan ê seba munaqeşeyê têkildarê babeta Îdrîs-î Bîtlîsî yenê domnayene zî vinderto. Goreyê agahîyan Abdullah Ocalanî pêvînayîş de derheqê babete de nê erjnayîşî kerdê: “Bi vîrardişê îtîfaqê Îdrîs-î Bîtlîsî yê mîranê Sunnîyan reyde, manaya xo no nîyo ke bi heme kêmanîyanê xo îtîfaq ganî bêro kerdene. Eksê ney, îtîfaqo ke verê cû goreyê menfeetanê mîran û serdestan awan bîyo, ewro goreyê menfeetanê şaran û bawerîyan ra newe ra bêro awankerdene.
Bêguman gerek ma endîşeyê elewîyan ê ke hafizaya tarîxî ra yenê, cîdî bigêrê. Tîya de armanc no nîyo ke elewîyî mîyanê Sunnîyan de bihelîyê, ma kurd û elewîyan nasname û taybetmendîyanê înan reyde bikerê kirdeyê awankerî yê nê îtîfaqê demokratîkî. Çîyo ke ma behs kenê ne îtîfaqê mîran o, la îtîfaqê şaran o. Armanc ne îtîfaqê serdestan o, la yê seypeyî û azadîye yo. Ronesansê elewîyan zî yew estuna bingeyêne ya nê ameyoxê hempar û demokratîkî yo.”
Abdullah Ocalanî ra seba Îranî: Hêrişan û dardekerdişan bivindarnê
Sewbîna çimeyan da zanayene ke Rayberê Şarê Kurdî Abdullah Ocalan serê Îranî de zî vinderto û nê erjnayîşî kerdê: “Stratejîya PJAKî raşt a. Stratejîya bê ke bikewê binê tesîrê tu hetan, şarî bipawê ca de ya. Ganî Îran dardekerdişan bivindarno û dest hêrişanê vera herêmanê Kurdan ra bianco. Eke nê çî nêkerê, heqê pawitişê rewa yê şarê Kurdî esto. Ganî Tirkîya zî tîya de rolêko pozîtîf bîyaro ca.”
Seba Mehdî Zanayî serweşîye waşte
Reyna Rayberê Şarê Kurdî Abdullah Ocalanî pêvînayîş de serê wefatê sîyasetmedarê kurdî Mehdî Zanayî de ke 29ê tebaxe de seba nêweşîya KOAHî cuya xo ra bîbî, Leyla Zana û keyeyî rê serweşîye waşte û vato ke Mehdî Zana seba ke şar Rayberîyanê Herêmîyan de bibo îrade wayîrê xebatan bîyo û xemgînîya xo arde ziwan.
