Dîyahîn Turhano ke dima 30 serran hepisxaneyî ra ame veradayene, derheqê prosesê “Aştî û Komelê Demokratîkî” ard ziwan ke Dewleta Tirkan hema zî gamê şenber nêeşta û wina va: “Meclîs de komîsyonêk dayî awankerdene, la hema zî tu gamê şenber nêeştî. Hewceyo ke dewlete kurdan reyde tifaq virazo.”
Rayberê Şarê Kurdî Abdullah Ocalan 27ê Sibata 2025î de vengê “Aştî û Komelê Demokratîkî” raya pêroyî rê kerd. Dima vengê 1ê Adare de PKK’î bi beyanatêk adirbest îlan kerd. Dima mabenê 5-7ê Gulane de 12. Kongreya xo pê ard û 12ê Gulane de zî netîceyê kongreye eşkera kerd. PKK kongre de qerarê xo fesîhkerdene da.
Her wina qerar da ke do peynîya têkoşînê çekdarî bîyaro. Ser vengê pêşengîya Hemsereka KCK’î Besê Hozat de komêk gerîla 11ê Temmuze de Şikefta Casenî ya Silêmanî de bi merasîmêko tarîxî çek veşnayî. Dima zî Meclîsê Tirkîyaye de “Komîsyonê Demokrasî, Wayûbirayî û Paştdayîna Netewîye” awan kerd.
Her wina Rayberîya Têgêrayîşê Azadîye ya Kurdistanî çarçiweya qeraranê 12. PKK’î de 26ê Citmenge de qerarê xoantişê Tirkîyaye ra da. Derheqê antişê Dîyadîn Turhano ke 30 serrî hepîs de mend û serbest ame veradayene, şîrove kerd.
‘Dewlete wezîfeya xo nêard ca’
Dîyadîn Turhan dîyar kerd ke na serrêka prosesêk est o û wina va: “Hetanî nika xeylê prosesî aver şîyê la demo ke ma nê prosesan ewnîyenî, dewlete verpirsîyarîya xo nêarda ca. Nika zî tay hetan de merdim vano qey dewlete nêcidî yo. Çi heyf ke dewlete bi xo zî nê yewpare ya, Rayberî zî wazeno zereyê dewlete de kam xurt bibo, uca de têkilîya xo bi nê baskî ra rono. Na têkilî ray ray aver şona, ray ray zî apey şona. Hewceyo ke dewlet kurdan reyde tifaq virazo.”
‘Çek sembolê înan ê tewr gird o’
Dîyadîn Turhan ard ziwan ke no proses de dewlete gamê zerrî ra nêeşta û wina domna: “Wa şarê kurd û Têgêrayîşê Kurdî, dewlete reyde entegrasyonêkî pê bîyarî. No entegrasyon nê yew hetî yo, wa bingeyê ci yê huquqî bibo. No bingeyê huquqî ma nêeşkenî awan bikerî, wa dewlete awan bikero. Êrişê ke est ê verba prosesî de bawerîya merdimi şiknena. PKK zaf samîmî yo, çikî dewlete de samîmîyet çin o. Kurdan estbîyayîşê xo dayî qebulkerdene. Hişmendîya ke ma aver benî, qiym nêkeno ke ma azadîya xo pê bîyarî. Nê babetan de tay astengî vejyayî verê ma zî, bi bedilnayîşê hişmendîyêka newe, ma do azadîya xo pê bîyarê.”
