Albumê “PîyaVa”yî yo ke hetê Hasan Alîyî ra hedre bîyo û tede Abîdîn Bîter, Alî Dogan Gonultaş, Işik Berfîn, Rûken û Vedat Yildirim zî est ê resa destê goşdaran.
Albumê PîyaVayî eynî sey nameyê xo pîyavatişan ra yeno pê. Hunermend Hasan Alî yo ke serran ra nata bi taybetî deyîranê kirmanckî vano, embazanê xo yê hunermendan reyde no proje dayo xo ver. Albumî de 6 deyîrî est ê. Nînan ra 5 deyîrî kirmanckî yê û yew deyîre zî tirkî ya. Na deyîra tirkî hetê Oğuz Aksaç û Hasan Alîyî ra ameya vatene. Qiseyê deyîre yê Karacaoğlanî yê û besteya ci zî hetê Hasan Alîyî ra ameya viraştene.
Hasan Alî, kirmanckî sey ziwanê eşqî terîf keno. Reyna o dîyar keno ke deyîrê ke Işik Berfîn Û Rûken reyde vatê, seba ey zaf taybet ê. Deyîra ke Vedat Yildirimî reyde ameya vatene enerjîya xo weş û berz a. Deyîra ke Abîdîn Bîterî reyde pîya ameya vatene karakterê kulturê govende û deyîra ke Alî Doğan Gonultaşî reyde ameya vatene zî efsûnê deyîşan nîşan dana. Aranjorîya albumê “PîyaVa”yî hetê Oner Gerçekî ra ameya kerdene. Album, bi etîketê KOM Muzîkî pêro platformanê dîjîtalan de cayê xo girewto!
Deyîrê ke albumî de ameyê vatene nê yê:
- Bîyo Bom (Vedat Yıldırım & Hasan Ali)
- Rîyê To Ra (Işık Berfin & Hasan Ali)
- De Bê Kotî Menda (Ali Doğan Gönültaş & Hasan Ali)
- Demedim Mi (Oğuz Aksaç & Hasan Ali)
- No Çi Derd o (Ruken & Hasan Ali)
- Govend (Abidin Biter & Hasan Ali)
