Konserê ke hetê Şaredarîya Xana Axparî ra ame organîzekerdene de, Mehmet Atli û Rûken Yilmaz vejiyayî sehneyî ser û bi deyîrana xo girse coş kerde.
Hetê Serekîya Karanê Kulturî û Komelî ya Şaredarîya Xana Axparî ya Amedî ra ‘Konserê Şarî yê Xana Axparî’ ame viraştene.Konser de ke şarê qezayî eleqeyêko pîl nîşan da, nameyê naskerdeyî yê muzîkê Kurdkî Mehmet Atli û Rûken Yilmaz vejiyayî sehneyî ser. Konserê ke Parka Nûjiyanî de ame viraştene de, astengdara çiman Nîsanur Fîdan a ke bi serê xo banderê piyanoyî bîbî zî vejiya serê sehneyî.
Konser de kaykerê Xana Axpar Belediyesporî yê ke Lîga 1. ya Amatore ya Diyarbekirî de bîbî şampiyon, madalya û kupaya şampiyonîye girewtî. Hemşaredara Xana Axparî Semra Akyuz verê konserî qiseykerdişêko kilm kerd û bale ante serê muhîmîya komelî ya estbîyayîşê ziwanê kurdkî. Akyuze dîyar kerd ke muzîkê kurdkî semedê averşiyayîş û ganîverdayîşê ziwan û kulturî zaf muhîm o.
Hemşaredarê Xana Axparî Mehmet Şerîf Arzu zî bale ante serê prosesê ke yeno rayraberdene û hêvî kerd ke no proses bireso netîceyêke û rayîrê sîyasetê demokratîkî akero. Mehmet Şerîf Arzu bale ante serê girêdana mabênê serkewtişê prosesî û hewanayîşê astengîyanê vera ziwanê dayîke de û waşt ke nêzdîbîyayîşê cîyakarî ya vera ziwan û kulturê kurdkî wextêko kilm de biqedîyê. Badê qiseykerdişan Nîsanur Fîdan vejîya sehneyî ser û bi deyîranê xo girse çoş kerde.
Konsero ke rastê eleqeyêko gird ê welatijan ame, badê girewtişê govende qedîya.
