Parlamentera DEM Partî Gulderen varli eşkerayîya seba Rojava de bale ant hêrişan ser o û vat: “Şima paştî danê zîhnîyeto ke sereyê merdiman birneno. La ma kurdî her tim terefgirê aştî yê û ziwanê ma zî ziwanê aştî yo.”
Platformê Sazgehanê Demokratîk ê Wanî derheqê hêrişanê vera Rojava de çatrayîrê Parka Mîlet a Rayîrê Armûşî de eşkerayî daye. Girseyî eşkerayî de pankartê “Rojava wîjdan, berxwedan û azadiye, teslîm nayê girtin” akerd û sloganê “Bijî berxwedana Rojava”, “Jin jiyan azadî”, “Gelê Kurd li gel Rojava ye” û “Kujer HTŞ hevkar AKP” vatê. Parlamentera DEM Partî ya Wanî Gulderen Varli û Mehmûd Dîndar, Hemşaredarê Wanî yê Şaristanê Girdî Neslîhan Şedal û Abdullah Zeydan, temsîlkarê sazgehanê sîvîl û xeylê welatijî beşdarê eşkerayî bîyê.
‘Ma do heta peynî xover bidê’
Parlamenter GuLderen Varli eşkerayî de îfade kerd ke kurdan her tim bawerîya xo bi hêzê xo yê cewherî arda. Gulderen Varli dîyar kerd ke kurdî ameyê kiştene, ameyê girewtene, ameyê koçberkerdene la reyna zî sereyê xo nêtewna û vat: “Ma nika ra pey zî hemverê şima de sereyê xo nêtewnenê. Her kesî têkoşînê kurdan ê bêeemsal ê vera DAIŞ’î dî û ma nika ra pey zî têkoşînê xo ra fek veranêdanê. Heme netewe-dewletî hemverê ma de yê la ma do vera nê heme dewletan xover danê. Ma tu wext sere nêtewnenê. Ma tîya de yê, Rojava ma yê û Rojava şorişê cinîyan o. Şima zîhnîyetek reyde ronişenê wardenê ke sereyê cinîyan birneno la ma kurdî her tim terefgirê aştî yê û ziwanê ma ziwanê aştî yo. Ma vengdanê şima ke nê zîhnîyetê Ebû Cehîlî ra fek veradê.”
