Platformê Pawitiş û Piştgirî yê Şaristanî yê Amedî derheqê rewşa merdimîye ya Kobanî de eşkerayî daye û vat: “Hetkarîya însanî berpirsîyarîyêka huqûqî ye, wîjdanî û însanî ya. Ganî Berê Sînorî yê Murşîtpinarê cade bêro akerdene.”
Platforma Pawitiş û Piştgirî yê Şaristanî yê Amedî bi sloganê “Wa bilez korîdorê hetkarîya însanî bêro akerdene” Salona Çand Amedî de eşkerayîya çapemenîye daye. Serekê Baroyê Amedî AbdulKadîr Guleçî metnê eşkerayî wend.
‘Krîzê însanî yê Kobanî roje bi roje beno gird’
AbdulKadîr Guleçî bale ant krîzê însanî yê şaristanê Kobanî ser o ke her roje zêde beno û beno felaket û wina vat: “Krîzê însanî yo ke şaristanê Kobanî de yeno vînayen, her ke şono beno felaketêko hîna gird û xorîn. Seba pêla koçberîya çetine ya hewteyê peyênan, hûmare bîya nêzdîyê 500 hezarî. Bingeyê ke est o nika nêeşkeno nê barî bigîro; çareserîya ca, werd, awa pake û xizmetê weşîye de krîzêko cidî yeno vînayene.”
‘Hetkarîyê ke erşawîyayê kêm ê’
Guleçî dewamê qiseykerdişê xo de da zanayene ke goreyê daneyanê Komîserîya Berze ya Koçberan a Neteweyanê Yewbîyayan (UNHCR), Sûrîye de mîyanê hîrê hewteyanê peyênan de zafêrê 100 hezar kesî koçber bîyî û wina vat: “Rewşa ewleyî, nuqtayê kontrolî yê leşkerî yê rayîran ser, resayîşê hetkarîyanê însanîyan ê herêman zaf çetin keno. Hetkarîyê ke hetê mekanîzmayanê hetkarîya însanîye yê mîyanneteweyîyan ra ameyî erşawitene, vernîya girsîya krîzî de kêmî menda.”
‘Awe, werd, betanîye û malzemeyê pakîye sereke yê’
Guleçî dîyar kerd ke 13 TIRê ke hetê Tirkîya ra seba hetkarîye ameyî erşawitene, vernîya lazimtîyanê cuye yê bingeyinî yê se hezar însanan de zaf kêm ê û wina domna: “Ewro lazimtîya tewr acîle ya şarê Kobanî awe, werd, betanîye, doşeg, malzemeyê pakîye û hacetê germkerdişî yê. TIRê ma yê hetkarîye ke hewcedarîyanê însanîyan ê bingeyînan ra virazîyayî, herêma ma de amade yê û pawenê. Eke desturê laizm bêrê dayene, hetkarî do bilez dest bikewe rayîr û do biresê şarê Kobanî.”
Vengdayîşê akerdişê korîdorî
Guleçî peynîya qiseykerdişê xo de îfade kerd ke hetkarîya însanî weçînek nîya û wina qisey kerd: “Hetkarîya însanî berpirsîyarîyêka huqûqî, wîjdanî û însanî ya. Bêvengîya hemverê nê felaketî ke tena çend kîlometreyan dûrê sînorî de qewmîyena, hemkarîya drama girde ya însanîyetî ya. Ma venga rayedaran danê ke cade berpirsîyarî bigîrê û seba Kobanî korîdorêkê hetkarîya însanî ya bêmabên awan bikerê. Eynî wextî de, ma ewro destpêkerdişê Kampanyaya Hetkarîya Însanî ya Lezgîne ya Kobanî îlan kenê. Heme detay, lîsteya lazimtîyan û vengdayîşê piştgirîye yê derheqê kampanyayî de do raya pêroyî reyde bi hewayêko şefaf û qonaxe bi qonaxe bêrê parekerdene.”
