Fîlozof Michael Lowy ke nêzdîbîyayîşê Rojavayê dinya yê vera hêrişanê Rojavayê Kurdîstanî ser o sey “xîyanet” bi name kerd, hişyarkerdişê xo kerd ke na polîtîka tena seba şarê kurdî ney seba ewleyîya Ewropa zî netîceyanê giranan xo reyde ana.
Lowy ke dîyar kerd ke amancê bingeyin ê hêrişan tasfîyekerdişê modelê demokratîk o ke herême de awan bîyo, vat: “Yew het ra polîtîkaya merkezîperwere ya otorîtere ya hukmatê Sûrîye, hetê bînî ra amancê Tirkîya yê qedînayîşê tecrubeyê xoserîya kurdan a Rojava, sebebê bingeyin ê nê hêrişan ê.”
‘Rojavayê dinya kurdan rê xîyanet kerd’
Lowyî vat: “Welatanê rojava seba çinkerdişê tehlukeyê DAIŞ’î hêzê kurdan ra feyde girewt. La ewro kurdan caverdanê. Na polîtîkaya tîpîke ya hêzanê girsan a. Çi heyf ke ewro kurdî tena piştîdayîşê dîyasporaya kurdan û hêzanê çepanê enternasyonalîstan ser mendî.”
‘Peymane huşk a, tehluke dewam keno’
Lowyî peymana mabênê HSD û hukmatê demkî yê Şamî erjnayê û vat: “Helbet şerî ra weşêr o la na peymanêka zaf huşk a. Garantîya ke Sûrîye de heqê xoserîya kurdan temîn bikera, çin a. Coka tekane garantîya pawitişê xoserîya kurdanê Sûrîye estbîyayîşê hêzanê înan ê çekdarî, yanî HSD yo. Çekveradayîşê înan, destpêkê peynîya estbîyayîşê xoser ê şarê kurdanê Sûrîye yo.”
‘Çinkerdişê Rojava beno trajedî’
Lowyî vat: “Rojavayê Kurdîstanî, vera heme problem, sînordarî û nakokîyan zî seba demokrasîya raştikêne û azadbîyayîşê cinîyan tecrubeyanê tewr averşîyaye yê dinya ra yew bî. Çinkerdişê ci vindîkerdişêko gird beno.”
Lowy ke bale ante ke tasfîyekerdişê Rojavayê Kurdîstanî seba ewleyîya Ewropa zî tehdîdêko gird virazeno, ard vîrî ke bi hezaran DAIŞijî Rojava de ameyê girewtene û vat: “Tenaverdayîşê Rojavayê Kurdîstanî hetê Ewropa ra xeletîyêka zaf cidî ya. Ez bawer kena ke do ameyox de poşman bibê.”
‘Erdoganî prosesê haştîye qet cidî nêgirewt’
Lowyî vat: “Hêrişê vera Rojava nîşaneyî naye yê. PKK’yî çekronayîşî qebul kerd, la Erdoganî tewr kêmî zî îradeyo weş nêmojna. Girewteyê kurdî hîna hepis de yê. Îdarekarê partîya kurdan a qanunîye ha hepis de yê. Şaredarê kurdî karî ra ameyî vetene.”
‘Komelê mîyanneteweyî ganî zordayîşêko sîyasî bikerê’
Lowyî peynî de vat: “Komelê mîyanneteweyî ganî heqanê şarê kurdî yê Sûrîye û heqê xoserîya Rojava de hetê sîyasî ra piştî bidê; Tirkîya û hukmatê Sûrîye ser o zordayîşêko sîyasî, dîplomatîk û eke lazim bo ekonomîk bikero.”
