DÊRSIM – Festîvala Kultur û Xoza ya Munzurî yê 24. roja diyîne de zereyê Mamekîye de meydanê Sey Rizayî de devam kena. Qomê Dêrsimî, Kuçeyê Hunerî de ameyî pêser û bi dawul û zirna kayî kay kerdê, govendî girewtê. Dima zî heta Meydanê Sey Rizayî bi şayî rayraşîyayiş ame kerdiş. Dimayê rayîrşîyayîşî Meydanê Sey Rîzayî de programê akerdişê festîvale ame kerdene.
Programê festîvale ke bi rêzgirewtene dest pêkerd, Endamê Komîteya Festîvale Umît Karabulut, Serekê Şaristanî yê Partîya Newîye Berkay Gundogan, Serekê Federasyonê Yewîya Dersimijan ê Demokratîk yê Ewropa (ADEF) Alî Tacer û Parlamentera DEM Partî ya Dersimî Ayten Kordu tede qisey kerd.
‘Zordarîya serê şarê Dêrsimî dewam kena’
Endamê Komîteya Festîvala Munzurî Umît Karabulutî, bale ante serê Festîvala Kultur û Xozaya Munzurî ser o û vat ke na festîvale demêko winasîn de ke dewî ameyêne veşnayîş û dejê tewr giranî ameyêne antene, ameya meydan.
Karabulutî dîyar kerd ke festîvale 24 serrî naye ra ver seba ke meseleyê Dersimî bêrê muneqeşekerdene û bêrê çareserkerdene dest pêkerd û ewro zî vera projeyanê madenan û talankerdişê xoza vengê xo berz kenê.
Karabulutî vat ke Dersim hîna zî binê tehluke û zordarîya girse de yo û wîna dewam kerd: “Pêro pîya bêrime têhet û ziwan, bawerî û kulturê xo rê wayîr vejîme.”
‘Festîvale vengê heqîqetî ya’
Serekê Şaristanî yê Partîya Newîye Berkay Gundoganî zî vat ke pê na festîvale vîrê ma yo hezaran serran reyna ame pêser.
Gundoganî eşkera kerd ke na festîvale vengê haqîqetî ya û wina vat: “Nê herdan nîşanê ma da ke xoza tena çimeyêk nîya, heqîqet û ciwîyayîşê ma ya.” Gundoganî derheqê Gulîstan Doku û Onur Seferî de zî aqubet û edalet waşt.
‘Wa ekolojî û kulturê Dêrsimî bêrê pawitene’
Serekê ADEF’î Ali Tacerî zî vat ke şarê Dersimî seba ziwanê xo, bawerî, kultur û heqê hemwelatîya xo serranê dergan o ke têkoşîn dano.
Tacerî vera viraştena herêmanê madenî de pîya nêrazîbîyayişê xo mojna û waşt ke koyî û vadîyê ma bêrê pawitene.”
No welat pê kede û têkoşînan ameyo nê rojan
Parlamentera DEM Partî ya Dersimî Ayten Kordu derheqê vîrê tarîxî de, dosyayanê vîndîbîyayeyan û têkoşînê azadî û polîtîkayanê herême ser o vindert.
Ayten Kordu eşkera kerd ke Dêrsim pê bedêlanê giranan resayo nê rojan û wina vat: “Na cografya pê kede û têkoşînê girs bîya û ameya nê rojan. Ez tewr verê Masum Pakan de, Seyîd Riza û hemrayanê ey, pêro cananê bêkefenan pîya bi hurmet yad kena. Ma reyêda bîne sozê orte vetena heqîqeti danê. Na cografya do rojêk teqez pey heqîqetî de bêro pêser.”
‘Ma do reyna vajê ‘Gulîstan Doku kotî ya?’
Kordu dîyar kerd ke rewşa wendekara unîversîte Gulîstan Doku ke 5ê çeleyê 2020î ra nat ma ci ra xebere nêgenê, muheqeq bêro eşkerakerdene. Kordu va ke vîndîbîyayîşê Gulîstan Doku tena yew hadîseyo ferdî nîyo: “Gûlîstan kênaya Dêrsimî ya. Temsîlê polîtîkayê bêmezelî yê ke bi serran o ke dewam kenê. Ma do reyna bîvajê ‘Gulîstan Doku kotî ya?’” Kordu seba pêro cinîyanê vîndîkerdeyan waştişê Komîsyonê Heqîqetî kerd.
Kordu bale ante serê polîtîkayanê ewleyî yê dewlete ser o û vat ke şar şino zîyar û dîyaranê xo ser nê cayan de zî kontrolê nasnameyan yeno kerdene û polîsê sivîlî qeyd gênê.
‘Bêyî têduştî aştî nêbena’
Derheqê prosesê Aştî û Komelê Demokratîk ser o zî wina vat: “Ma seba komelêko demokratîk aştî silam kenê. Labelê seba ma aştî; yewbîyayîşê heqîqetî, awankerdişê demokrasî û şinasnayîşê bawerî û zîyaranê ma ra şino. Bêyî hemwelatîya têduşte aştîya raştikêne nêbena.”
Dawetê têkoşînî yê vera projeyanê madenan
Kordu têkoşînê vera projeyanê madenan zî wina vat: “Rêxistinbîyayişê vera nê projeyan muhîm o. Rêxistinbîyayîş; waştişê herd, ziwan, nasname û ciwîyayişê xo rê wayîrvejîyayîş o.”
Dimayê qiseykerdişan program bi kaykerdişê kayanê serê herême Varvara û Simsime qedîya.
