Heyeto ke 39 kesan ra yeno pê û Platformê Aştî û Azadîye yê Ewropa (EFFP) ci rê pêşengî keno, seba ke bieşko Rayberê Şarê Kurdî Abdullah Ocalanî bivîno, yeno Tirkîya.
Heyeto ke akademîsyen, rojnameger, nuştox, sîyasetmedar, hiqûqnas û sendîkakeran ra yeno pê, do mabênê 1 û 2yê temmuze de pêvînayîşan bikero.
EFFP seba ke hetkarîya çareserîya demokratîke ya meseleyê kurdî bikero, kampanyaya “Ez wazena Abdullah Ocalanî bivîna” dabî destpêkerdene.
Sere de Almanya, Fransa, Belçîka û Swîsre kampanya xeylê welatanê Ewropa de dewam kena.
Heyet do destpêkê 1ê temmuze de Buroyê Hiqûqî yê Seserrî zîyaret bikero ke avûkatîya Abdullah Ocalanî keno.
Heyet eynê rojî de do Rêxistina Şaristanê Stenbolî ya Partîya Demokrasî û Têduştî ya Şaran (DEM Partî) zîyaret bikero û dima ra do Hemserekê Pêroyî yê DEM Partî Tuncer Bakirhanî reyde bêro têhet.
Dayîşûgirewtişê heyetî do 2ê temmuze de Taksîm de otelêk de bi “Kombîyayîşê Derûdorê Maseya Gilover de” dewam bikerê.
Kombîyayîşî de seba çareserîya meseleyê kurdî do îmkanê hetkarî yê mîyanneteweyî, xurtkerdişê kanalê sîyaseto demokratîk û perspektîfê çareserîya aştîyane bêrê erjnayene.
Kombîyayîşî ra pey zî nameyê heyetî ser o do encamnameyêko hempar bêro weşanayene.
Heyet do pêvînayîşan ra pey Tirkîya ra şêro.
