Denîz Poyraz a ke 17ê hezîrana 2021î de Îzmîr de awanîya HDP’yî ya Îzmîrî de encamê hêrişêko çekdarî de ameybî kiştene, serrgêra wefatê xo yê 4. de ameyê vîrardene.
Xebatkar û endama HDP’yî ya Îzmîrî Denîz Poyraz 17ê hezîrana 2021î de Îzmîr de awanîya HDP’yî ya Îzmîrî de encamê hêrişêko çekdarî de ameybî kiştene. Poyraz serrgêra kiştişê xo yê 4. de Goristanê Kaynaklar ê Buca de bi merasîmêk ameye vîrardene.
Keye, embazê Denîz Poyraz, Dayîkê Aştî, Têgêrayîşê Cinîyanê Azadan (TJA), rêxistinê şaristan û qezayân ê Partîya Têduştî û Demokrasîyî ya Şaran (DEM Partî), parlamenterê DEM Partî Adalet Kaya û Burcugul Çubuk, xeylê temsîlkarê partîyanê sîyasîyan, rêxistinê girseyî yê demokratîkî û welatijî beşdarê merasîmê vîrardişî bîyê.
Merasîm bi rêzgirewtişê seba cangorîyanê têkoşînê azadî û demokrasîyî dest pêkerd.
Endama Dayîkanê Aştî ra Muzeyyen Kortak merasîmî de qisey kerd û var: “Şehîdê ma rûmetê ma yê. Ma do taqîbkerdoxê şehîdanê xo bî.”
Dima Parlamentera Amedî ya DEM Partî Adalet Kata qisey kerd û dîyar kerd ke hêriş, hêrişêko polîtîk o û wina vat: “No hêriş, hêrişêko vera aştî, têduştî û îradeyê pîyaciwîyayîşî yo. Denîz Poyraz temsîlkara mîlyonan bîye. No hêrişêko polîtîk bi. Ma do vîrardiş û têkoşînê aye pîlêr bikerê.”
Maya Denîz Poyraz Fehîme Poyraz zî vîrardişî de qisey kerd û dîyar kerd ke ê bi qerar ê ke têkoşînê kênaya xo bidomnê û nê çîyî vatî: “No têkoşîn, têkoşînê cinîyan û ciwanan o. Eke ma bibê yew, kes nêeşkeno ma bin bifîno. Kamcîn şert û mercan de zî beno wa bibo, ma do berpirsîyarîya xo bîyarê ca.”
Merasîmê vîrardişî bi vatişê sloganî “Şehîd namirin” qedîya. Dima ra zî awanîya Rêxistina Şaristan a DEM Partî seba vîrardişê Denîz Poyraz sînevîzyonêk ame mojnayene.
