Rojnameger Delîl Zîlanî îfade kerd ke Rayberê Şarê Kurdî Abdullah Ocalanî caardişê peymana mabênê HSD û hukmatê demkî yê Şamî de berpirsîyarîyêka girde girewta û vat: “Rayber Ocalanî seba Rojava her çî kerd. Badê entegrebîyayîşî Rojava kurdî do xo rayra berê. La ganî şarê Kurdîstanî haydar bo, tehluke hema zî nêqedîyaya.”
Dimayê peymana Parîsî ya mabênê hukmatê demkî yê Şam, Îsraîl û Tirkîya vera herêmanê Rayberîya Xosere planêkê orterawedaritişî kewt merîyetî. Çarçewaya planî de 6ê çele de grûbê çekdar ê girêdayeyê hukmatê demkî yê Şamî bi piştgirîya Tirkîya hêrişê taxanê Şêxmeqsûd û Eşrefîye kerd. Dimayê îşxalkerdişê her di taxan grûbanê çekdar na rey verê xo da herêmanê kurdan ê Rojavayê Kurdîstanî. Rayberîya Xosere dimayê hêrişanê orterawedaritişî vengdayîşê seferberîye kerd û seba pawitişê Rojavayê Kurdîstanî dest bi xoverdayîşî kerd.
Dimayê vengdayîlê Rayberîya Xosere çar hetanê Kurdîstan û teberê welatî de şarê kurd û dostê kurdan weriştê we. Bi hezaran kesan verê xo da sînoran û sînorî rijnayê û Başûr û Vakurê Kurdîstanî ra vîyartê Rojava. Dimayê xoverdayîşê çar hetanê Kurdîstan û teberê welatî hêzanî ke planê orterawedaritişî rayra berdêne, bêçare mendêne ke apey game bierzê û 30ê çeleyî de bi mabênkarîya Amerîka û Fransa peymanêk ameye îmzakerdene.
Rayberê Şarê Kurdî Abdullah Ocalan zî seba qedîyayîşê şer û çareserîyêka bi dîyalog û domdare seba peymane dayîşûgriewtişî kerdê. Encamê cehdanê Rayberê Şarê Kurdî Abdullah Ocalanî vernîya planê orterawedaritişê destkewteyanê kurdanê Rojava ame girewtene.
Rojnameger Delîl Zîlan ke Rojava de rojnamegerî keno û hedîseyan nêzdî ra taqîb keno ajansê ma rê qisey kerd û peymana ke ameya îmzakerdene û tesîrê ci erjnayê.
‘Xoverdayîşê her çar hetanê Kurdîstanî planê çinkerdişî binvist’
Delîl Zîlanî vat: “Badê kombîyayîşê Parîsî vera heme kurdan planêk amebi amadekerdene. Bi nê planî waştêne kurdan û destkewteyanê kurdan binfînê. Waştêne peymana Sykes-Picotî newe bikerê. La kurdan her çar hetanê Kurdîstan û teberê welatî de na tehluke dîye û wirzîyayê payan ser. Bi nê têkoşînî hetanê ke plan de cayê înan est o mecbur mendî ke adirbestî îlan bikerê.”
‘Rayber Ocalanî berpirsîyarîyêka girde girewte’
Zîlan vat: “Rayber Ocalanî verê cû zî nameyî şawitibî Îdareya Xoserî û Mazlûm Ebdî rê û vatibî planêk esto û ganî kurdî estbîyayîşê xo na plane de bipawo. Ey vatibî pirsgirêkî bi muzakereye bêrê çareser kerdene û şer nêbo. Badê nê hêrişan zî bale ante na xale ser. Eke ma ewro qala agirbestêke kenê û vernîya qirkerdiş ameya girewtene, ew rolo Rayber Ocalanî yo.”
‘Rojava de kurdî do xo rayra berê’
Delîl Zîlanî derheqê peymane de dîyar kerd ke xoserîya herêmanê kurdan yena pawitene û vat: “HSD do sey xo bimano û herême xo bipawa. Sazgehê Îdareyê Xoserî do sey xo bimanê û eynî şeklî kar bikerê. O muhîm o yo ke Rojava de kurdî xo rayra berê û hêzê HTŞ’î do nêkewê zereyê herême.”
